ilisimatusarnermik isumaqatigiissut

Nunarput Japanilu ilisimatusarnikkut qaninnerulerput

Oqaluttuarisaanermi siullerpaamik Kalaallit Nunaanni Pinngortitaleriffik aamma Japanimi det Nationale Polarforskningsinstitut tallimanngormat ilisimatusarnikkut isumaqatigiissummik atsioqatigiipput

Forskningsaftale mellem Grønland og Japan
Pinngortitaleriffiup pisortaata Klaus Nygaardip, Japanimilu Nationale Polarforskningsinstitutip pisortaata Kazuyuki Shiraiship suleqatigiinnissamik isumaqatigiissut atsiuleraat, isiginnaartuliullugit Nunanut Allanut Tunngasunut Naalakkersuisoq Vittus Qujaukitsoq, Japanillu Ambassadøria Seishi Suei

Kalaallit Nunaanni Pinngortitaleriffik aamma Japanimi det Nationale Polarforskningsinstitut ippassaq tallimanngornermi ilisimatusarnermi isumaqatigiissummik, isumaqatigiissutit taamaattut siullersaannik, atsioqatigiipput, illua’tungeriillu neriuutigaat atsioqatigiinnermikkut ilisimatusarnikkut qaninnerulissallutik.

Pinngortitaleriffik tusagassiorfinnut nalunaarutikkut taamatut paasissutissiivoq.

Japanimiut Qaanaap eqqaani sermersuup aakkiartorneranik ilisimatusarnermik ingerlatsilereerput, Nunatsinnili ilisimatusarnertik annertusarusoqaat, Pinngortitaleriffik suleqatigalugu.

Japanimiut immikkut ilisimasaat

Illua’tungaatigullu uumassuseqarnerup silallu pissusiata, tamakkualu inunnut sunniutaasa, ataqatigiissuseqarnerannik ilisimatusarnermi japanimiut immikkut ilisimasaat Pinngortitaleriffiup iluaqutigerusuppai.

– Issittumi qanoq pisoqarnera uagutsinnut Japanimiittunut pingaarutilerujussuuvoq. Silap pissusiata allanngorarnerisa sunniutai qanimut misigisarpavut, assersuutigalugu ukiukkut persertalernerujussuatigut aasakkullu siallernerujussuartalerneratigut. Taamaattumik pisussaaffeqarpugut nunani tamalaani ilisimatusarnitta annertusarnissaanut, taamaasilluni nunarsuarmioqatigiit allannguutit sunniutaannik siulittuinissaminnut pikkorinnerulersinnaammata.

Taamatut oqarpoq Japanimi det Nationale Polarforskningsinstitutimi pisortaaq, professor Kazuyuki Shiraishi.

Amerlasuunik ilisimasaqarfilik

Aamma Pinngortitaleriffiup nuannaarutigaa japanimiutd Issittumi Ilisimatusarnermik Ingerlatsiviannik suleqatigiinnissamik isumaqatigiissuteqarnertik, taassuma ilisimasaqarfigilluarmagit silasiorneq, sermersuarmik ilisimatusarneq, silaannarmik avataanilu atmosfærimik ilisimatusarneq, aammalu Sikuiuitsumi Kujallermi pissutsinik ilisimatusarnermik sivisuumik misilittagaqarluni.

– Isumaqatigiissuteqarnikkut tamatumalu kinguneranik suleqatigiilluni suliniutigiligassatigut, Pinngortitaleriffiup naatsorsuutigaa japanimiut nunatsinni ilisimatusarnerat tassaalluinnassasoq, ´Nunarput pillugu´ ´Nunarpullu peqatigalugu´ ilisimatusarneq.

– Japanimiut Qaanaami annertujaamik ilisimatusarnerat Pinngortitaleriffimmi Silap pissusianik Ilisimatusarfiup ilisimatusarnermik suliaanut naapertuulluinnarput. Tamatumunnga atatillugu sermimik ilisimatusarneq sammitinneqarnerugaluttarpoq silap pissusiata, uumassuseqarnerup inuiaqatigiillu akornanni attuumassuteqarneranik, Pinngortitaleriffiup pisortaa Klaus Nygaard oqarpoq.

Taarseeqatigiinneq

Suleqatigiinnissamik isumaqatigiissummut ilaapput sulisunik, qaraasiatigut paasissutissanik atugassanillu allanik, ataatsimut soqutigisaqarfigisanik, taarseeqatigiittarnissat.

Illua’tungeriit periarfissaqartillugu aamma ilisimatusarnermik suliniutimik akuleriississinnaanissaat soqutigaat, aningaasartuutillu tamarminnut iluaqutaasumik qaqugukkut avinneqarsinnaanersut, Pinngortitaleriffik paasissutissiivoq.

Powered by Labrador CMS