Arktisk Råd
Nunarput Issittumi siunnersuisooqatigiinni peqataaqqilerpoq
Issittumi siunnersuisooqatigiinni peqataajumajunnaaraluarneq Nunatta nukittuallassimalluni qaangera Naalakkersuisut siulittaasuat Aleqa Hammond oqarpoq, peqataaqqilernerlu ataasinngornermi ualikkut nalunaarutigaa
Issittumi siunnersuisooqatigiinni Nunatsinnut attuumassuteqartut oqallisigineqartillugit Nunatta toqqaannartumik peqataasarnissaa qulakkeerneqarpoq. Taamaammat Naalakkersuisut siulittaasuat Aleqa Hammond Siumumeersoq, nunanut allanut ministeriaqarfik aamma Savalimmiuni naalakkersuisut siulittaasuat Kaj Leo Holm Johannesen suleqatigiillutik nalunaarput Nunarput Issittumi siunnersuisooqatigiinni peqataaqqilersoq.
- Siulittaasoqarfik Canadamit maanna tigummineqartoq peqatigalugu angusaq assut nuannaarutigivara. Issittumi suleqatigiinnermi Kalaallit Nunaata peqataanissaanut periarfissat annertuumik nukittorsarneqarput, taamaasilluni Issittumi Siunnersuisooqatigiit ataatsimiinnerini tamani Kalaallit Nunaata siunissami peqataasarnissaa qulakkeerneqaqqilluni, Naalakkersuisut siulittaasuat Aleqa Hammond Siumumeersoq oqarpoq.
Kalaallit Nunaata Issittumi siunnersuisooqatigiinni inissisimanera pillugu Danmark aamma Savalimmiut qanimut suleqatigalugit Canadami siulittaasoqarfik isumaqatigiinniarfigineqarsimavoq.
- Nuannaarutigaara isumaqatigiinniarnerit taama naammassilertortigimmata. Naammassilertorunerisa aamma takutippaa issittumi pissutsit tamakkiisumik oqaluuserineqarsinnaanngitsut Nunarput peqataatinnagu. Isumaqatigiinniarnermi aamma tunaartaavoq namminersorneq pillugu inatsit tassani kalaallit inuiattut akuerisaammata, Aleqa Hammond oqarpoq.
Nunanut Allanut Sillimaniarnermullu Ataatsimiititaliaq isumaqatigiinniarnermi angusaq pillugu ataasinngornermi ilisimatinneqarpoq.