Nunarput ileqqussaasunik siunnersuisoqatigiinnik pilersitsissava?
Nunatsinni ileqqussaasunik siunnersuisoqatigeeqalissasoq 2017-imi aalajangerneqarpoq. Mimi Karlsenili (IA) naapertorlugu pilersitsinissaq 2018-imi unitsinneqarsimavoq.
Nunatsinni ileqqussaasunik siunnersuisoqatigiilernissamik pilersitsiniarneq sumut killippa?
IA-mi inatsisartunut ilaasortap Mariia Simonsenip tamanna eqqumiigaa. Paragraf 37 atorlugu tamanna pillugu 31. maj apeqquteqarpoq.
Inatsisartut isumaqatigiittut siunnersuisoqatigiimmik pilersitsinissaq 2017-imi akuersissutigaat, siunnersuisoqatigiinnilli pilersitsinissaq pillugu kingorna allattoqaqqissimanngilaq.
17. juni 2022, Mariia Simonsenip apeqquteqarneranit sapaatit akunneri marluk qaangiuttullu, apeqquteqaataa akineqarpoq.
- Ileqqussaasunik Siunnersuisoqatigiinnik pilersitsinissamut siunnersuut 2018-imi unitsinneqarsimasoq Naalakkersuisut paasissutissiissutigisinnaavaat.
Apeqqutini itisilerniarai
Meeqqanut, Inuusuttunut Ilaqutariinnullu kiisalu Peqqissutsimut Naalakkersuisoq, Mimi Karlsen (IA) taama akissuteqarpoq.
- Akissutigineqartoq naatsuararsuuvoq. Taamatulli aperisimagaanni, aamma taama akineqartarpoq, Mariia Simonsen Sermitsiaq.AG-mut oqarpoq nangillunilu:
- Apeqqutiga immaqa naammaginarsimanngilaq, maannali aperissaanga sooq suliaq 2018-imi unitsinneqarsimanersoq.
Mariia Simonsen apeqqutiminut akissutimi malitsigisaanik paragraf 37 atorlugu apeqquteqaqqissaaq. Inuiattut Ullorsioreerutta apeqqutigissavaa sooq suliniut unitsinneqarsimanersoq, maannalu qanoq pisoqassanersoq.
