Nunarput EU-mut isumaqatigiissut aqqutigalugu akiuussutissamik qulakkeerunneqarsimavoq
Danmark EU aqqutigalugu innuttaasut 2,4 millionit Covid-19-imut akiuussutaasinnaalersussamik akiuussutissalernissaannut periarfissaqarpoq. Kalaallit Nunaat Savalimmiullu aaqqissuussinermut aamma ilaasut, peqqissutsimut ministeri oqarpoq.
EU-kommissioni nakorsaasiorfimmut AstraZenecamut isumaqatigiissusiorsimavoq, EU-p akiuussutissamik immikkoortunik 300 millioninik pisisinnaatitaaneranik qulakkeerinnittumik.
Akiussutissaq akuerineqassappat Danmark akiuussutissamik pissarseqataassaaq, tamannalu Kalaallit Nunaannut Savalimmiunullu aamma iluaqutissanngussaaq:
- Akiuussutissaq sunneiruteqarluarpat isumannaatsuuppallu Danmark akiuussutissamik qallunaat 2,4 millionit missaanniittut akiuussutissalerneqarnissaannut naammattumik qulakkeerinnissimavoq - taakkununnga ilanngulllugit Kalaallit Nunaanni Savalimmiunilu innuttaasut, peqqissutsimut ministeri Magnus Heunicke (Soc.) tallimanngornermi tusagassiortunik katersortitsinermi oqarpoq.
Arlalinnik isumaqatigiissusiornissaq sulissutigigaat
Akiuussutissarli akuerineqaqqaassaaq. Tamatuma peqatigisaanik EU-kommissioni nakorsaasiorfinnut arlalinnut allanut akiuussutissaasinnaasut allat pillugit isumaqatigiissuteqarnissamik aamma sulissuteqarpoq.
Siunissami ungasinnerusumi innuttaasut tamarmik akiuussutissalerneqarnissaannut naammattumik akiuussutissaateqalernissaq siunertaavoq.
Nakorsaasiornermut aqutsisoqarfimmi Lægemiddelstyrelsenimi pisortaq, Thomas Senderovitz, tusagassiortunik katersortitsinermi nassuiaalluni oqarpoq, EU-p assingisunik arlalinnik isumaqatigiissusiornissaa naatsorsuutigigini.
- Ukiup tulliata ingerlanerani Danmarkimi innuttaasunik akiuussutissalersuilernissarput ilimagaara, Thomas Senderovitz naliliivoq.