Nunarput Atlantikumi mingutsitsinnginnerunissamut naaggaarpoq
Nunarput Atlantikumi umiarsuit angallannerannut sumiiffimmik annikitsumik aniatitsiffiusumik pilersitsisoqarnissaanik Canadamit Portugalimillu siunnersuummut akerliliisimavoq. Tamanna avatangiisinik illersuiniaqatigiiffimmit eqqumiigineqarpoq.
Nunarput Atlantikumi umiarsuit angallannerannut nunat tamalaat akornanni sumiiffimmik annikitsumik aniatitsiffiusumik atuutilersitsisoqarnissaanik Canadamit Portugalimillu siunnersuummut akerliliivoq. Sumiiffik annikitsumik aniatitsiffiusoq kujataanit Kanariat Qeqertaat Afrikap Europallu sineriaatigut avannamut Kalaallit Nunaat kimmullu Canada USA-lu killeqarfigalugit annertussuseqassaaq. Sumiiffik annikitsumik aniatitsiffiusoq ullumikkut Europap avannaani atuuppoq Akullersuarmilu 2025-mit atuutsitsisoqalernissaa naatsorsuutigineqarluni.
Aviisi Sermitsiaq taama allappoq.
Nunalerinermut, Imminut Pilersornermut, Nukissiuutinut Avatangiisinullu Naalakkersuisoqarfik aamma Ineqarnermut Attaveqaasersuutinullu Naalakkersuisoqarfik naapertorlugit, Kalaallit Nunaata siunnersuummut akerliliisimanera ilumoorpoq, tamatumunngali pissutaalluni, tusarniaanermut piffissaliussap sivikissimanera, nunattalu tungaanit siunnersuutip nunatsinni inuiaqatigiinnut aningaasaqarnikkut kingunerisassai misissorneqaqqaarusummata.
– Suliaq tamanna maannakkorpiaq Canada qanimut suleqatigalugu ingerlanneqarpoq. Naalakkersuisoqarfik nunatsinni umiarsuit angallannerannut kingunissaasinnaasunik qulaajaanermi Canadamik pitsaasumik ineriartornartumillu suleqateqarpoq, siunnersuut tunngavissaqarluartumik naliliiffigisinnaaniassagatsigu, Nunalerinermut, Imminut Pilersornermut, Nukissiuutinut Avatangiisinullu Naalakkersuisoqarfimmit, Natuk Lund Olsen, Sermitsiamut allappoq.
Aviisimi Sermitsiami atuarnerusinnaavutit. Aviisi uani pissarsiariuk:
