naligiissitaaneq
Nunarput arnanik naligiissitsinermut nalilerneqassaaq
Marlunngormat Kalaallit Nunaat, Savalimmiut Danmarkilu sutigut tamatigut arnanik assigiinngisitsinerup qaangerneqarnissaanik FN-ip arnanut isumaqatigiissutaanik malinninnerannik nalilerneqassapput, tamannalu pissaaq FN-ip europami qullersaqarfiani, Schweizimi Genéve-mi
Februaarip 24-anni Kalaallit Nunaat naligiissisinermut nalilerneqassaaq, tamannalu pissaaq FN-ip europami qullersaqarfiani, Schweizimi Genéve-mi.
Nalilerneqaqataassapput Danmark Savalimmiullu, tassuunalu qulakkeerneqassaaq Naalagaaffeqatigiinni nunat taakkua pingasut FN-ip arnat sutigut tamatigut naligiissinneqarnissaannik isumaqatigiissutaa malikkaat, naalakkersuisut.gl-imi nutaarsiassatut allassimavoq.
Kalaallit Nunaat nalilerneqassaaq nalunaarusiaq tunngavigalugu, tassani naligiissitsiniarnermi sammisat, kisitsisitigut takussutissiat, inatsisit il.il. taakkartorneqarsimallutik, nassuiarneqarlunilu kingullermik 2009-mi nalilerneqarnerup kingorna naligiissitaaneq siuarsarniarlugu qanoq iliuuseqartoqarsimanersoq, assersuutigalugu sulisartoqarnermi ilinniagaqartitsinermilu. Naliliinerup kingorna FN-ip komitea tullianik naliliinissamut pitsanngorsaatissanik inassuteqaateqassaaq.
Nunarput inissisimalluarnerulerpoq
Kingullermik 2009-mi nalilerneqarnerup kingorna naligiissitaanermut inatsit nutaaq akuersissutigineqarpoq kiisalu nakuusernermut periusiortoqarlunilu pilersaarusiortoqarluni, ilaatigut arnanut nakuusertarneq akiorniarlugu, naalakkersuisut.gl- mi allassimavoq.