Nunarput aningaarsiornikkut ajalusooriaannaavoq
Erik Jensen (S) Naalakkersuisunik isornartorsiuivoq suliassaminnik tulleriaarinerminni coronap ajornartoortitsinerata kingorna nunatta aningaasaqaarnerata iluarseqqinniarnissaa tunulliullugu allat tamaasa salliummatigit. Jensen kaammattuivoq Naalakkersuisut pimoorussinerulissasut piaarnerpaamillu nunatsinni suliffeqarfinnut ikiorsiinissaq sulissutigineqassasoq.
Pingaartumik sinerissap qanittuani aalisarnermi aningaasasarsiornikkut ajunaarnersuaqalersinnaanera Siumup tungaanit ilungersunarluinnartutut isigineqartoq, aviisi Sermitsiaq allappoq.
– Nunatta aningaasarsiornikkut ajalusoorsinnaaneranut aarlerinartorsiorneq piuvoq, taamaattorli sinerissap qanittuani aalisarneq ajunaarnersuaqaleriaannaavoq, tassami aningaasarsiorfigilluartakkanik aalisarneq iluatsinngitsoornikuummat. Nipisanniarneq iluatsinngitsoorpoq, nipisaammi suaasa kilomut akia apparaluttuinnarpoq, tamatumalu saniatigut nunatsinni suliffissuit nipisaat suaannik tigoqqaanerat pisarnermit annikinneerarsuuvoq. Saarulleqarpoq, taamaattorli aamma saarulliit kilomut akikilligaluttuinnarput aamma. Sinerissap qanittuani aalisartorpassuaqarpoq aningaasarsiorunnaavittunik, taakkuli aningaasartuutigisartagaat akiligassaallu unigatik ingerlaannarput. Pissutsit nalinginnaasuuppaata namminneerlutik aningaasartuutissatik matussusersinnaasaraluarpaat, nalunngilarpulli tamatta, aamma minnerunngitsumik Naalakkersuisut nalunngilaat pissutsit nalinginnaasut atuutinngitsut. Taamaammat pisariaqarluinnarpoq aalisartut immikkut ittumik iliuuseqarfigineqarnissaat, Erik Jensen (S) Sermitsiamut oqarpoq.
Siumut sinnerlugu Erik Jensen qaammat sinnerlugu matuma siorna ilassutitut aningaasaliissutissat 2020-moortut Inatsisartuni suliarineqarneranni Naalakkersuisunut piumasaqarpoq annaassiniarnissamut iliuuseqartoqartariaqartoq – pingaartumik sinerissap qanittuani aalisartut eqqarsaatigalugit.
Aviisimi Sermitsiami atuarnerusinnaavutit. Aviisi uani pissarsiariuk: