Nunarput aatsitassanik piiaafinngoqqippoq

True North Gems ullumikkuminngaanniit Qeqertarsuatsiaat eqqaanni rubininik safirinillu aappaluttunik qaamasunik piiaanini aallartippaa.

Selskabi børsimut nalunaarutikkut taamatut paasissutissiivoq.

– Ulloq Kalaallit Nunaata piiaaffimmik suliffissuaqaleqqinnera oqaluttuarisaanikkut pingaaruteqartuuvoq, True North Gems Grønland A/S-ip pisortaa Bent Olsvig Jensen oqarpoq.

Piiaaffiup nutaaliap inuussutissarsiut qaffatseqqippaa

– Ingerlatsivinni siullerpaat ilagaatigut namminersorlutik oqartussat aatsitassarsioqatigiiffinnut akuersissuteqariaasaat nutaaq atorlugu siuariarluarnermik takutitsisut. Piiaaffitta tamakkiisumik ingerlalernissaa qilanaaraarput, taannalu Kalaallit Nunaanni piiaaffinni nutaajunersaallunilu nunarsuarmi ujaqqanik qalipaatilinnik erlinnartunik piiaaffinni nutaaliaanersaalluni.

Maskiinat ujaqqat erlinnartut tunisassiarineqarnissaannut ilusilersuutissat suli amigaatigineqarput. Maskiinat nunatsinnut nassiunneqareersimapput, tikippatalu ikkussorneqassapput, TNG Sermitsiaq.AG-mut paasissutissiivoq.

Pilersaarutit malillugit 2016-imi kvartalimi siullermi piaaneq tamakkiisumik ingerlanneqalersimassaaq.

Maanna rubinmalmit annertoorujussuit piiarneqarput, taamaasilluni maskiinat ilusilersuutissat piiaaffimmi ikkussorneqareerunik ´nerisassaqarluassallutik´.

Selskabi piginnittoq tulluusimaarpoq

– True North Gems Inc., True North Gems Grønland A/S suleqativullu tamaasa sinnerlugit nuannaarutigeqalugu oqaatigisinnaavara Aappaluttumi piiaaneq aallartikkipput, Nicholas Houghton, selskabimit piginnittumeersoq, oqarpoq.

– Aatsitassarsiornerup aningaasaqarnikkut unammilligassarpassuaqarluni sakkortuumik atugaqarnerata nalaani nuannerluinnarpoq takullugu kikkut tamarmik tamaviaarlutik sulissutigisimasaat piviusunngortoq, True Northimillu piginneqataasunut takusinnaalermassuk piiaaffik aallartinneqartoq.