Nunaqarfiup ammaqqinneqarnissaanik tamaviaarutiginnittoq: Nukittusariaqarpugut
Politikerit – ullumikkut politikeriusut siornatigullu politikeriusimasut – nunaqarfimmiut ikioqqunerannut paasinnilluarnerminnik ersersitsipput. Suliaq Ukiakkut Ataatsimiinnermi oqaluuserineqassaaq: - Illorsuit inuiattut ullorsiornermi ammarneqaqqittariaqarput, Lars-Emil oqarpoq.
Siumup siulittaasorisimasaa Illorsuarmiuusimasorlu, Lars-Emil Johansen, Avannaani nunaqarfigisimasami qanoq pineqarneranik paasisaqarsinnaannginnerarpoq.
Aviisi AG taama allappoq.
– Karrat Kangerluat tassaarsuarmit 2017-imi eqqugaammat Illorsuarni najugaqartut annerusumik ulorianartorsiortinneqarsimanngillat. Nunaqarfik kalluarneqanngilaq. Qimmip meqqunnguanik ataasinnguamilluunniit ajoqusertoqanngilaq. Taamaakkaluartoq nunaqarfimmiut pinngitsaalillugit nuutsinneqarput, ullumikkumullu, ukiut pingasut qaangiutereerneranni, illuminnut angerlarnissaminnut suli utaqqillutik, oqarpoq.
Taamaammat qanoq pisoqartariaqarnersoq isumaqarpit?
– Isumaqarpunga nunaqarfiup ammaqqinneqarnissaa pillugu politikkikkut aalajangiisoqartariaqartoq. Tamanna tullianik inuiattut ullorsiornitsinni naleqqulluinnartumik pisinnaavoq, akivoq.
Ajoqqusertoqanngitsoq
Kisianni GEUS suli isumaqarpoq, kangerlummi qaqqat sisoornissaannut taamalu tassaarsuaqarnissaat suli annertuumik aarlerinartoqartoq?
– Suulluunniit annilaanngatigiuaannarneqarsinnaapput. Kisianni taamani qaqqap sisoornera Illorsuarnit 60 kilometerinik ungasissusilimmi pivoq. Tassani ajoqusertoqanngilaq. Nuugaatsiamisuunngitsoq, tassanimi ajunaarnersuarmik pisoqarmat, Lars-Emil Johansen akivoq ilassuteqarlunilu:
- Illorsuarni aalisartut tusaasimavakka oqaluttuartut, imaq aalalaaginnartoq, pisarnermit ulinnerusoq. Kisianni sissaq malerujussuarnit taamani eqqorneqanngilaq. Aammami: Ilulissani innuttaasut piffissap ilaani iluliarsuaq aserormat pinngortitami ajunaarnersuarmik misigisaqarsimapput. Kisianni imaanngilaq tamanna pissutigalugu illoqarfik tamaat inuerussortinneqalersoq.
Allaaserineqartoq aviisimi AG-mi tamakkiisumik atuaruk. Aviisi uani pisiarineqarsinnaavoq: