akissarsititsineq
Nunaqarfinnit atuartunut oqilisaaneq
Qeqqata Kommuniani atuartut nunaqarfimmeersut inuunerannut suliniut oqilisaataasussaq maanna kommunip atuilluartuunissamik akissarsititsissutigisartagaanik akissarsitinneqarpoq.
15-inik ukioqarluni Atammimmit Maniitsumut atuariartorneq angerlarsimaffimmut ungasittutut misiginarsinnaasarpoq.
Taamatullu aamma angajoqqaat Atammimmiittut meeqqatik taama misigisimaffigisarpaat.
Tamannarpiarlu suliniutip 'Nunaqarfinni atuartunik akuutitsineq' iliuuseqarfigaa. Tamannalu pitsaasumik angusaqarfigisimagamikku atuilluartuunissamik suliniuteqarnermut Qeqqata Kommunianit 100.000 koruuninik akissarsitinneqarput.
Angajoqqaat weekendimi tikisillugit
Suliniut marlunnik immikkoortoqarpoq. Ilaagtigut angajoqqaat atuartut angerlarsimaffiannut tikeraarnissaannut periarfissinneartarput, meeqqat qanoq innerannik takuniaajartorlutik. Aamma meeqqat nunaqarfimmiut inuusuttut ilinniarfiinut pulaarnissaminnut periarfissinneqartarput, taamaalillutik ilinniagaq pileriginerlugu paasiniassagamikku.
- Meeqqanut skolehjemmimi najugalinnut angajoqqaat, atuarfinni pisortat/ ilinniartitsisut, aammalu ilaqutariinnermut immikkoortortami sulisut kiisalu ilaqutariinnut inerisaavik
ataatsimoorlutik sapaatip akunnera naanersiorput, tassanilu atuartut atuarfimmi ingerlanerat, illoqarfimmilu ulluinnarni inuunerat tusagaqarfigalugu, Maniitsumi ilinniartitaanermut pisortaq, Anna Heilmann oqaluttuarpoq.
- Atuarfiup meeqqanut suliniarnerata angajoqqaajusut ilaqutaasullu tapersersuinissaat, aammalu ilaqutaasunik qaninnerusumik suleqateqarnermik pilersitsinissaq anguniagaavoq.
Ilinniartoqarfinnut pulaarneq
Atuartut ilaatigut Atammimmeersut, Itillimeersut, Sarfannguaneersut aamma Kangerlussuarmeersut illoqarfinni paasisassarsiorlutik angalanikuupput. Tassani ilaatigut inuusuttunut ilinniarfinni ulluni nalinginnaasuni misigisassanut kiisalu suliffeqarfinnut ilinniartoqarfinnullu pulaarnissamut periarfissiisoqarpoq.
Suliniutitigut siunertaasoq tassaavoq, nunaqarfinni atuarfiit, pingaarnertullu atuarfiup akornanni pitsaanerusumik ataqatigiinnermik pilersitsineq, suleqatigiinnerup
nukittorsarneqarneranik aammalu nunaqarfinni atuartutut nunaqarfinnilu ilinniartitsisunut ilisimasanik kivitsineq, ilinniartitaanermut pisortaq Annga Lynge Sisimiuneersoq oqaluttuarpoq
- Illoqarfinni atuarfinni atuarfiup ingerlariaasianik nunaqarfinni atuartut ilinniartitsisullu takunnissinnaalissapput.
Suliniummi 'Nunaqarfinni atuartunik peqataalersitsineq' suleqatigiit tassaapput nunaqarfinni atuarfinni pisortat ilinniartitsisullu kiisalu sumiiffinni ilinniartitaanermut pisortat.