Nunaqarfinni tunisassiorneq sikkorlunneranit ajornartorsiortinneqartoq
Uummannap Sulluata sikuusarnerata allanngornerata kingornerisaanik Royal Greenlandip aalisakkeriviini toqqorsiveqarneq nalilersorneqassaaq.
Silaannaap sikuusarneratalu allanngoriartornerisa kingunerisaanik, Uummannap Sulluani Royal Greenlandip aalisakkeriutaani qaleralinnik tunisassiorneq eqqornerlunneqarpoq.
Aviisi Sermitsiaq allappoq.
Uummannap eqqaani siornatigumut naleqqiullugu siku saannerulersimasoq, taamaammallu siku ukiup ilaani siku iluamik aalisarfissaasimanngitsoq, Uummannap eqqaani nunaqarfinni aalisartut piniartullu peqatigiiffiisa arlallit oqaatigaat. Royal Greenland A/S, Uummannami, Ikerasanni, Ukkusissani Saattuni aalisakkeriviuteqarpoq.
Nunaqarfinnilu ukiuunerani aalisarneq kipisaqattaanngitsumik ingerlaannarnissaa qulakkeerniarlugu, nunaqarfiit aalisakkeriviini qalerallit qerisut uninngasuutigineqartut sikukkut Uummannamut assartorneqartarput. Ukiorli manna siku imak saatsigaaq siornatigutut annertutigisumik Uummannamut assartuisoqarsinnaasimanani. Tamannalu pissutigalugu Ikerasammi Ukkusissanilu aalisakkerivinni qerititsiviit ulikkaartoorput, tunisinerlu uninngatinneqartariaqarsimalluni.
Royal Arctic Line A/S-ip angalanissaanut pilersaarutai naapertorlugit, Uummannaq 18. april taassumalu kingorna nunaqarfiit tikinneqassapput. Nunaqarfinnilu tunisassiorneq ukiuunerani ingerlaannarsinnaaqqullugu, siunissaq ungasinnerusoq eqqarsaatigalugu Royal Greenland aaqqissutaasinnaasunik eqqarsalereertariaqartoq, sulisseqarfissuarmi tunisassiornermut pisortaq, Lars Nielsen oqarpoq.
Uummannap Sulluani aalisakkeriviit uninngasuutaat sikukkut assartorneqarnissaanissaat qulakkeerniarlugu, 2017-imi Uummannami Royal Greenlandip aalisakkanut suliffissuaataata nutarterneqarneranut atatillugu qerititsivik anginerusumik ilaneqarneqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: