suliffissaaleqineq
Nunaqarfinni suliffissaaleqisut amerliartortut
Naak Nunatsinni suliffissaaleqisut ataatsimut isigalugu annikilleriaateqarsimangaluartut, nunaqarfinni amerleriaateqarsimapput
Apriilip qaammataani suliffissarsiortutut nalunaarsukkat 3.108-nik amerlassuseqarput, taakkunannga 563-it nunaqarfinneersuullutik.
Ukiup siuliani qaammammut apriilimut sanilliullugu suliffissarsiorlutik nalunaarsimasut 133-nik ikinnerupput. Illoqarfinni suliffissarsiortutut nalunaarsimasut 236-nik ikileriarput.
Kalaallit Nunaata Naatsorsueqqissaartarfiata kisitsaataani nutaami takuneqarsinnaavoq.
Atuaruk: Suliffissat amerlanerusut katsorsaataapput pitsaanerpaat
Nunaqarfinni amerleriartut
Ukiup siulianut piffissap taamaasinerani nunaqarfinni suliffissarsiortut 460-usimapput. Kisitsillu maanna 563-nut qaffaariaateqarsimavoq, tassa suliffissarsiortut 103-nik amerliariarsimallutik.
Suliffissarsiorlutik nalunaarsukkat saqqummersinneqartarput kommuninut suliffissarsiorsimasut tunngavigalugit. Qaammammi inuk ataaseq suliffissarsiortutut naatsorsugaasarpoq, qaammatip ingerlanerani ataasiarluni arlaleriarluniluunniit nalunaarsorneqarsimanera apeqqutaatinnagu. Suliffissarsiortutut nalunaarsukkat qaammatikkaartumik saqqummersinneqartarput.
Nalunaarsukkat illit najukkani qanoq pisoqarsimanera assip ataani takusinnaavat