Nunaqarfinni najugallit utaqqisuni saarlerpaanngortinneqassapput

Nunaqarfinni najugallit tassaarsuarmik eqqugaasinnaasut illoqarfimmut nunaqarfimmulluunniit allamut nuukkusuppata Naalakkersuisuniit ikiorserneqarsinnaasut neriorsuutigineqarnikuuvoq. Taamaakkaluartorlu qanorpiaq Naalakkersuisut ikiuiniarnersut ersarissarneqarnikuunngilaq. Maannalu Avannaata Kommuniani INI A/S-ip utaqqisunut allattorsimaffianut saarlerpaanngortinneqassasut, Ineqarnermut Naalakkersuisup nalunaarutigaa.

- Una immikkut illuinnartuummat ulorianartorsiorfiusuni najugallit kommunip Naamminersorlutillu Oqartussat inissiaataanut utaqqisut allattorsimaffiani saarlerpaanngortinneqassapput, taama Ineqarnermut Naalakkersuisup Naaja Nathanielsenip Sermitsiaq.AG-ip saaffiginnissutaanut akissuteqarpoq.

Kommuni INI A/S-ilu suleqatigiissapput

Nuukkusullutik kissaateqartut tamarmik Avannaata Kommunianit sullinneqassapput. Kommunilu INI A/S suleqatigalugu inissianik attartortakkanik ujartuissapput.

Ilaqutariit qulit Niaqornaniit Qaarsunniillu nuukkusupput. Avannaata Kommuniata oqaasii naapertorlugit taakkua utaqqiisaagallartumik Uummannamut nuutsinneqassapput. Kisiannilu qaqugorpiaq nammineq inigilersinnaasaanut nuunneqarnissaa suli nalunartoq, Avannaata Kommuniani pisortaanerup Nick Nielsenip siuliani ilisimatitsissutiginikuuaa.

Avannaata Kommuniani INI-p utaqqisunut allattorsimaffiutaanut 2019-imeersumi inissianut attartortakkanut utaqqisut katillugit 1.668-iupput.

- Naalakkersuisut soorunami suliap ingerlanerani qanimut malinnaassapput. Kommunilu inissianik ujartuinerani qanimut suleqataasaagut, nuukkusuttut sukkanerpaamik nuuttarniassammata, Ineqarnermut Naalakkersuisoq allappoq.

Nuukkusukkaani Avannaata Kommunia uunga attavigineqarsinnaavoq: 38 78 47 imaluunniit katastrofe@avannaata.gl.