Nunaqarfinni najugallit peqqinnissaqarfik toqqissisimanartinngilaat
Innuttaasut peqqinnissaqarfimmik misigisaat pillugit nalunaarusiap nutaap takutippaa nunaqarfimmiut peqqinnissaqarfiit sulisuisa peqqissutsimut atatillugu piginnaasaasa amigarnerat ernummatigigajuttaraat.
Kalaallit Nunaanni innuttaasut peqqissusaannut ingerlatsivik 2019-imi aasaanerani misileraalluni pitsaassutsimik misissuititsivoq, innuttaasut Kalaallit Nunaanni peqqinnissaqarfimmik misigisaat misissorlugit.
Aviisi Sermitsiaq taama allappoq.
Misissuinermi siunertaavoq paasissallugu peqqinnissaqarfik qanoq innuttaasunit misigineqartarnersoq, suullu innuttaasunit peqqinnissaqarfimmik atuisutut pingaartinneqarnersut.
Nalunaarusiap taaguuteqartup “Kalaallit Nunaanni peqqinnissaqarfik atuisut isaannit isigalugu” ilaatigut takutippaa nunaqarfinni atukkat illoqarfinniit allaanerusut nunaqarfimmiullu taamaallaat peqqinnissaqarfimmi sulisut piginnaasaasa amigarnerat ernummatigineq ajoraat, aammali isorartussutsit annertuut, anori silalu.
Nalunaarusiami atuisut ilaat ima oqaluttuarpoq:
- Nunaqarfipput avinngarusimasorujussuarmiikkami toqqissisimanartuaannanngilaq. Taama avinngarusimatigisumi najugaqarluni apeqquserneqarsinnaavoq ilinniagaqarsimanngitsup najukkami kisimiilluni sullissinera (qupp. 37).
Nunaqarfimmiut aamma saaffiginnikkaangamik eqarnerujussuaq oqaluttuaraat, ilaannikkut pinartoqartillugu soorlu ajutoortoqartillugu nunaqarfimmi peqqinnissaqarfimmut toqqaannartumik saaffiginnissinnaanatik, angerlaqqaarlutilli napparsimmavimmut sianertariaqarlutik, kingornalu ajoqut paasiniarneqassalluni, qanorlu katsorsaasoqassanersoq paasitinneqarluni.
Atuisut marluk pinartumik ajoqusernerminni saaffiginnikkamik pineqarnertik ima oqaatigaat:
- Peqqissaanermik suliallip isigaanga, tigusinnaanangali, nammineerlunga angerlaqqaassagama tassanngaanniillu [illoqarfimmi] napparsimavimmut sianissallunga, taakkulu peqqissaanermik sulisoq attavigissammassuk. Kilerujussuarpunga oqarfigineqarlungalu sianissasunga. Sulisoq susinnaanngilaq sianinngikkuma, illoqarfimmi napparsimavimmut sianereeruma taanna nalunaarfigineqassaaq qanoq iliussanerluni (qupp. 37)
- Ajutoorama anisariaqarsimapput mersuinermik siusinnerusukkut pikkorissarsimasumik, ujaasiartorlutik. Peqqinnissaqarfiup avataaniittumik nassaartariaqarsimapput (qupp. 38)
Aviisimi Sermitsiami atuarnerusinnaavutit. Aviisi uani pissarsiariuk: