Nunaqarfimmiut internettikkut tuluttut atuartinneqartartut
Qeqqata Kommuniani nunaqarfimmi Napasumi meeqqat avataaniit tuluttut ilinniartinneqartarput, nunarsuaq tamakkerlugu suliniutaasoq The Granny Cloud skype-kkut aqqutigalugu.
Napasumi Napasup Atuarfiani granny-nut attaveqartarneq aasaanerani atuanngiffeqareernerup kingorna aallarteqqeqqammerpoq. Atuartitsisuat, Pamela, Skype aqqutigalugu atuartitsisarpoq taannalu najugaqarfinnut isorliunerusunut nunarsuarmi piffinni assigiinngitsuneersunut; Indien, Hong Kong aamma USA allallu, akeqanngitsumik atuartitsinermik nammineq kajumissutsiminnik sulisorpassuit akornanni neqerooruteqarnikuuvoq.
Qeqqata Kommunia allappoq.
Pamela Tuluit Nunaanni allaffeqarpoq Napasumilu atuartut ataasinngornikkut atuartittarlugit.
Ataasinngorneq oktobarip 28-ani Pamela-p Napasumi atuartut feriarnermini assilisaminik isiginnaartissimavai. Tamatuma kingorna klassi nuannisarpoq oqaatsinillu "susunik" pinnguarlutik soorlu sinilluni, aalateraluni, qungujulalluni, tassani nuannarineqarnerpaajulluni erinarsorneq.
- Tassani meeqqat ilinniartitsisorlu erinarsorput qinngatik mileqqaatigalugit! Taamaaliorneq klassimi nukappiaqqat ilaanniit aallartinneqarpoq illartitsilaavissorlunilu. The Granny Cloud-ip meeqqat isorliunerusuni najugalinneersut tuluttut atuartinneqartarnissaat ajornarunnaartippaa. Maanna atuartut Napasumeersut 1. klassimi aallartikkaangamik tuluttut atuartinneqarsinnaalerput, nalunaarutigineqarpoq.
Ataani video-mi Qeqqata Kommuniata aaqqissugaani, avataaniit atuartitsinermi immiussap ilaa takusinnaavat, ilinniartitaanermullu pisortaq Anna Heilmann, atuarfimmi pisortaq Magdalene Kristiansen aamma atuartut the Granny Cloud pillugu misilittakkaminnik ajunngitsunik oqaluttuartut tusaaneqarsinnaapput: