Nunaqarfimmi tunillaassuuffiusumiit: Tasiusami mianersorpugut
Avannaata Kommuniani tunillatsittut aqqaneq-marluk paasineqarput, taakkunannga arfineq-pingasut nunaqarfimmi Tasiusamiipput: - Coronatoqarnera nunaqarfitsinni malugaarput, kisianni immitsinnut mianersorpugut, nunaqarfinni aqutsisunut ilaasortaq Aron Eskildsen oqarpoq.
Tasiusami innuttaasut 250-it missaaniipput, massakkullu coronamik tunillatsissimasut arfineq-pingasuullutik. Tamannalu nunaqarfimmi malugineqarsinnaasoq, nunaqarfinni aqutsisunut ilaasortap Sermitsiaq.AG-imut oqaluttuaraa:
- Aallaqqaamut tusaamasat aallaavigalugit tupannaraluarami, kisianni maannakkut mianersorrappugut. Peruluttoqarpalunnginnera taanna qujanarnerpaavoq. Neriuppunga oqitsumik atussagaat qaangiilluarumaartullu. Neriunarpoq nunaqarfitsinni siaruarterpallaassanngitsoq, Aron Eskildsen oqarpoq.
Tasiusami tunillatsissimasut akornanni peruluttoqanngitsoq, Nunatta Nakorsaaneqarfiata uppernarsapaa.
Tunillatsittoqarsimaneranik nutaarsiassiisoqarmat inuit akornanni uippallertoqanngitsoq, Aron Eskildsenip aamma oqaluttuaraa.
- Uippallertoqanngitsoq malunnarpoq aamma amerlanerit akiuussutissanik kapitereernikuupput. Kapitinneqanngitsunik aamma peqarpoq, mianersornerlu annertooq nunaqarfitsinni atorneqartoq malunnarpoq, nunaqarfinni aqutsisunut ilaasortaq oqaluttuarpoq.
Tunitsivik matoqqavoq
Aron Eskildsenip oqaasii aallaavigalugit nunaqarfiup fabrikkiani sulisoq tunillatsissimavoq. Tamannalu nunaqarfimmi sunniuteqarpoq:
- Fabrikkimi sulisoq tunillatsissimagami tunitsivik matoqqavoq. Qujanartumik nunaqarfinnut allanut aalisartut tunisiartortarput, taanna oqarpoq.
Tasiusami Upernavimmilu aqunneqarsinnaanngitsumik tuniluuttoqarsinnaaneranik pasitsattoqareersorlu sumiiffinni juulip 24-ani annertuumik misissuisoqalerpoq.
Nunaqarfinni aqutsisut siulittaasuat Regine N. Bistrup oqaasii naapertorlugit innuttaasut 30-40-it missaaniittut misissortinnatik angerlartiinnarneqarsimapput, misissuutit nunaqarfimmut nassarneqartut nungummata.
- Innuttaasut 30-40-ullu missaaniittut arfininngormat misissortinngitsoorput. Misissuutit nungukkamik. Misissuinerit nassiunneqarput sinneri suli misissortinneqanngitsut, Regine N. Bistrup Sermitsiaq.AG-imut oqaluttuarpoq.
Arfininngornermi juulip 24-ani misissuutit naammassimanngitsut, Nunatta Nakorsaaneqarfiata uppernarsarpaa. Maannalu illoqarfiit nunaqarfiillu naammattunik misissuutinik peqalersut paasissutissiissutigalugu.