Ilimanaq
Nunaqarfimmi takornarialerinissamik suliniut atoqqaarfissiorneqartoq
Ukiuni pingasuni nunaqarfimmi Ilimanami KGH-p illuutai eqqissisimatitat iluarsartuunneqareerlutik atoqqaarfissiorneqarput
Ilimanami illut marluk 1700-kkunneersut iluarsaanneqareerlutik Naalakkersuisoq Hans Enoksenimit atoqqaarfissiortinneqarput.
Atoqqaarfissiortitsineq ullumi sisamanngornermi Ilimanarmiuni, suliniummi sanasunit, aamma Realdania Bygimit, Qaasuitsup Kommunianit aamma Naalakkersuisut peqataaffigisaannik aaqqissuussinikkut nalliussineqarpoq.
Tamanna qangaanerusoq aaffannianit najungaqarfigineqartarsimavoq, siunissamilu takornarialerinermik, pinngortitamik, aalisarnermik, piorsarsimassutsikkut kingornussat kiisalu piujuaannartitsinermik naapiffiussaaq.
Takornarialerinermik pingaaruteqartoq
Ilimanaq takornariat tikiffissaattut ineriartuaarnermini pimoorussaqarnissamut periarfissat nutaat takussutissaapput. Tassaapput World of Greenlandimi suliffeqarsinnaanerit – aammali takornarianut neqeroorutinik nammineq ineriartortitsisinnaanerit, soorlu angalaartitsinertut ilusilittut, unnuiffissanik neqeroorutitut, tammajuitsussanik tunisinertut, kiisalu neriniartarfimmut nioqquteqarnertut ittunik.
- Maani innuttaasunut suliaqarusussusilinnut attuumassuteqartuusussanik aallarnisaasartunut Naalakkersuisut siunnersuinermik tapiissuteqarnermillu periarfissanik arlalippassuarnik peqarput. Ukiuni takkuttussani Qeqertarsuup Tunuani takornariartitsisoqarnerani Ilimanaq assupilussuaq qularutissaanngitsumik pingaaruteqalissaaq, tamaanimi piffissami takkuttussami periarfissanik assut pissanganartunik takkuttoqartussaassaaq, Naalakkersuisoq Hans Enoksen ilaatigut taama oqarpoq.