Nunaqarfimmi nipilersornermik ilinniarfik: Soqutiginnilluartut meeqqanik 20-nik agiarnermik ilinniartitsisut

Agissat tallimat nipilersornermillu ilinniartitsisup ataatsip, Kullorsuarmi meeqqat agiarnermik ilinniarnissaannik periarfissaqartippai.

Kullorsuaq fra luften

Upernaaq nipilersornermik ilinniartitsisoq Katharina Qvist Nuummeersoq nunaqarfimmut Avannaanut Kullorsuarmut meeqqanik agiarnermik ilinniartitsiartorluni aallarpoq, tamannalu iluatsilluarpoq. Avannaata Kommunia kommunip nittartagaani taama oqaluttuarpoq.

Maanna meeqqat 20-t ilinniartinneqarput, meeqqanillu peqataarusuttunik utaqqisut allattorsimaffianniittoqarpoq.

Suliniutip iluatsilluarnera tupaallaatigalugu, Kullorsuarmi sunngiffimmi pisortaq, Birgitta Kamman Danielsen oqaluttuarpoq:

- Tupaallaatigisorujussuuara meeqqat taama soqutiginnitsigimmata. Soorunami ilai ilaajunnaarnikuupput, kisianni amerlanerit soqutiginneqaat ilinniartinneqarnissaminnut qilanaartuaannarlutik, Birgitta Kammann Danielsen oqaluttuarpoq.

Agiartartoqatigiit suliniuteqartut

Grønlands Strygerforening – Nunatta agiartartoqatigiivinit taanna attavigineqarneranit suliniut aallartippoq, Nunatsinni agiartarnerup inerisarnissaanut, pilersaarummullu aningaasaateqarfinnut qinnuteqarsimalluni. Nunaqarfimmullu agiaaqqanik tallimanik pissarsisoqarneranik kinguneqarpoq.

Upernaaq nipilersornermik ilinniartitsisoq Katharina Qvist tikippoq, nunaqarfimmilu ilinniartitsisinnaanini nuannaarutigaa:

- Agiarsinnaaneq aamma nipilersorneq inuuninnut ilaasorujussuusoq qujamasuutigisaqaaralu periarfissinneqarsimagama alliartorninnut agiaq ilaalluinnarsimammat. Taamaattumik kissaatigisarsimavara meeqqanut inuusuttuaqqanullu periarfissiissutigissallugu agiassap ilinniartitsissutiginissaa, Katharina Qvist, Avannaata.gl naapertorlugu taama oqaluttuarpoq.

Ilinniartitsineq qarasaasiatigut nanginneqassaaq

Ukioq atuarfiusoq una Kullorsuaq ornillugu ilinniartitsivigineqarpoq. Aasaanerani atuanngiffeqarnerup kingorna 2023-imi ilinniartitsineq aamma qarasaasiatigut ingerlanneqalissaaq.

- Agiarnermik ilinniarsimasunik sungiusimasalinnik inoqarfiit tamarmik peqarsinnaanngillat, taamaattumik allatulaaq qarasaasiatigut ilinniartitsinerit ineriartortippavut, Hanne Saandvig Immanuelsen, Nunatta agiartartoqatigiivineersoq taama oqaluttuarpoq.

Powered by Labrador CMS