Nunaqarfiit uku imeqarfii nutarsarneqassapput
Nunaqarfiit sisamat imeqarfii ukiuni tallimani tullerni nutarsarneqassapput.
Imeqarfiit nutarsarnissaat pillugit Nukissiorfiit ukiunut tullernut pilersaarusiorsimavoq. Aqqa Samuelsenip (IA) paragraf 37 atorlugu apeqquteqaataanut Aqqalu Jerimiassen (A) taama akissuteqarpoq.
- Kangaatsiap eqqaani nunaqarfiit, nunaqarfippassuit allat assigalugit Nukissiorfiit nunaqarfinni iluarsaassinermik ingerlatarisaanut ilaapput, taamaattumillu imeqarfigisaat taarsersorneqartuarlutillu iluarsaanneqartuassapput, Aqqalu Jerimiassen ilisimatitsivoq ilanngullugulu allalluni:
- 2019-imi Attumi imeqarfik nutaaq sananeqassaaq, taamatuttaarlu tasermut pitsaanermik imeqarfiusumut anginerusumut erngup salinneqanngitsup aqqutissaa nutaaq pilersinneqassaaq.
Ukiunut tallimanut pilersaarut
- 2019: Attu
- 2021: Iginniarfik
- 2022: Ikerasaarsuk
- 2024: Niaqornaarsuk (2016-imi qutsissumiittutut imeqarfigisaq
- iluarsaanneqarpoq)
Milliuunilikkaanik akeqassaaq
Nunaqarfiit pitsaasumik imeqartinnissaat akikigisassaanngilaq.
Attumi nutaamik imeqarfiliorneq 14 milliuunit koruuninik akeqassaaq, Nukissiorfiillu naliliipput Iginniarfimmi, Niaqornaarsummi Ikerasaarsummilu nutarterineq nutaanillu sanaartorneq 15 milliuunit koruuninik aamma akeqassasoq.
- Taakkununngalu ilaliutissapput Kangaatsiami imeqarfimmi, kiisalu siammarterisarfittut aaqqissuussiviusuni aserfallatsaaliuiuarnissat aamma ineriartortitsinikkut suliniutit, akissummi allassimavoq.