Nunaqarfiit eqqugaasussanut: Innaallagissiorfiit ajunaarnersuarmut pilersaarusiaqanngitsut

Uummannap eqqaani tassaarsuaqassappat nunaqarfinni tallimani innaallagiamik imermillu pilersuisoqarunnaaratarsinnaavoq. Nukissiorfiit suli pilersaarusiunngillat, oqartussallu allat ajornartorsiut aaqqiiviginiarlugu maanna suleqatigineqaleruttorput.

Nukissiorfiit innaallagissiorfiit pillugit suli pilersaarusiaqanngilaq. Taamaattorlu oqartussat allat upalungaarsimanermilu suliaqartut qanimut suleqatiginiarpai.

OBS: Nukissiorfiit saaffiginninnerata kingorna allaaserisaq allanngortilaarneqarpoq.

Niaqornat, Qaarsut, Saattut, Ukkusissat Ikerasallu aatsaat taama annertutigisumik tassaarsuaqassappat sarfaaruttussaapput. Innuttaasut innaallagiamik pilersorneqarnerat unittussaasaaq.

Taannaannaanngilarli. Annaassiniarnermimi ajornakusoortitsisoqarsinnaavoq. Annaassiniartut pinngitsoornatik qaammaqqusersorneqarnissaat pisariaqartussaavoq, annaassiniarneq sukkanerpaamik ingerlanneqassappat.

Innaallagissiorfiit pingaaruteqarput

Innaallagissiorfik ajoquserneqarpat aamma oqarasuaatikkut attaveqaatit ajoquserneqariaannaapput. Nalunaarasuartaateqarfiit innaallagiamik pilersorneqarunnaassappata nalunaarasuartaateqarfiit sillimmatinik batteereqartut Tele-Post ilisimatitsivoq.

Ajorluinnartumillu pisoqassappat oqartussat annaassiniarnerat oqarasuaatit qaammataasatigut attavillit atorneqarsinnaasut pisariaqalersinnaasut politiit upalungaarsimanermut naliliinerani allaaserineqarpoq.

Attaveqarnerlu eqqarsaatigalugu immikkut naliliisoqarnissaa Karrat Kangerluanni ulorianartorsiorfiusinnaasunut upalungaarsimanermi nalilersuisut, tassa Kalaallit Nunaanni politiit nalilersuisoqaqqittoqarnissaa pisariaqarsoraat.

Nukissiorfiit pilersaarutissarsiorput

Uummannap eqqaani qaqqap sisooratarsinnaaneranut navianaatinik nalilersuineq Nukissiorfinnit imaannaanngitsutut isigineqarpoq, aaqqiissutaasinnaasunillu oqartussat peqatigalugit suliaqartoqassaaq.

- Misissuinerit paasissutissallu nutaat Nukissiorfiup ilumoorsaartumik tiguai. Maanna oqartussat allat upalungaarsimanermilu suliaqartut suleqatigalugit aaqqiissutissamik pitsaanerpaamik ujartuivugut, nukissiornermi pisortaq, Kaspar Mondrup Sermitsiaq.AG-mut taama oqarpoq.

Innaallagissiorfiit tallimat nunaqarfinniittut immamut qanipput, taamaattumik sarfaarunnissaq imermillu pilersuisoqarunnaaratarsinnaanera misissuinerup takutippaa.

Annaassiniarnissamut upalungaarsimasut piffissap sivikitsup iluani imermik imigassamik assartuussisariaqalertussaapput.

Powered by Labrador CMS