isumasioqatigiinneq
Nunaqarfiit ataatsimiinnerat: Ilinniartitaanerup nunarfiit siuarsassavai
Nunaqarfiit pillugit Ilulissani isumasioqatigiinnermi suliffissaaleqineq oqaluuserineqartut ilagaat
Nunaqarfinni suliffissaaleqinerup akiorniarnissaani ilinniartitaanut periarfissat pitsanngorsarnissaat. Inuusuttorpassuit suliffissaaleqinermit eqqugaasarput pingaartumik ilinniarsimanngitsut eqqugaasarlutik.
Atuaruk: Kanunupe: Naalakkersuisunit tusaaniarneqarsimanngilagut
Nunatsinni naatsorsueqqissaartarfiup kisitsisaatai malillugit aprilimi nunaqarfinni suliffissaaleqisutut nalunaarsorneqarsimasut 647-upput taakkunanna angutit 309-ullutik arnat 338-it suliffissaaleqisut.
Suliffissaaleqinerup akiorniarnissaa nunaqarfiit pillugit Ilulissani isumasioqatigiinnermi oqaluuserineqartut ilagaat. Suliffissaaleqinerup akiorniarnissaani ilinniartitaaneq periarfissatut Naalakkersuisut tikkuarpaat. Aammali periarfissat allat qaqilerneqarput.
- Suliffissaqarfiusunut nuttarnerulernissamut aningaasaliissutit ajornannginnerusumik pissarsiarineqarsinnaalersinniarlugit inatsisissatut siunnersuutigineqartoq Naalakkersuisut aamma saqqumiuppaat, inuussutissarsiornermut, aatsitassanut sulisoqarnermullu naalakkeruisoq Jens-Erik Kirkegaard Siumumeersoq oqarpoq.
Atuarfimmi suliniut
Naalakkersuisut siunniuppaat suliffissaaleqisut 2017 nallertinnagu affaannanngortinniarlugit. Inuusuttut 29-it ataallugit ukiullit tassaanerupput suliffissaaleqinermit eqqugaasartut.
- Inuusuttut ilinnialeqqinnissaat suliffeqalernissaallu anguniarlugu pitsaanerusumik suliniuteqarfigineqartariaqartut siunnersuutigineqarpoq, Piareersarfiit taakkununnga neqeroorutigisartagaanni inissat 100nik ukiuni 2015-imi ilaneqassapput. 2016-imi 250-inik inissanik ilallugit aamma 2017-imi 2018-imilu 400-nik ilaneqassallutik, Naalakkersuisut nalunaarput
Ilinniartitaanermut, kulturimut ilagiinnut naligiissitaanermullu naalakkersuisup Nick Nielsenip Siumumeersup sulinit Nuiki isumalluarfigaa.
Suliniummi tassani inuusuttut nunaqarfimmiut neqeroorfigineqartarput 10. klassemut assigusumik atuartinneqarnissamik kalaallisut, qallunaatut, tuluttut kisitsinemrilu. Taamaasilluni inuusuttut ilinniagaqalernissamut piukkunnarsarniarneqarput.
- Suliniummi pitsaasumik angusaqartoqarpoq, naammassisartullu amerlapput, Naalakkersuisut nalunaarput.
Suleqatigiit maanna pilersinneqarput Naalakkersuisut, kommuneqarfik peqatigiiffiata Kanukokap aamma nunaqarfimmiut peqatigiiffiata Kanunupe-mi peqataaffigineqartoq taakkulu nunaqarfiit inerisarneranni suliniutit pingaarnerit pillugit suliaqassapput.