Nunaqarfiit angallaffigineqarneq ajortut

Naalakkersuisut Nanortaliup nunaqarfiinut ukioq naallugu ilaasunik angallassisoqarsinnaaneranut aaqqiissutissarsiorlutik sulipput.

Aappilattumi, Tasiusami Narsarmiijinilu innuttaasut ukioq manna apriilimiit juunip naaneranut Nanortalimmi ilaasartaatinik atuisinnaasimanngillat.

Tamanna attaveqatigiinnermut naalakkersuisup Inatsisartuni ilaasortamut Anders Olsenimut (S) akissuteqarnermini uppernarsarpaa.

Attaveqatigiinnermut Naalakkersuisup Naaja Nathanielsenip (IA) ilisimatitsissutigaa, ilaasunik angallassisarneq pillugu siorna kiffartuussinissamik isumaqatigiissummi tamanna nassuiaatissaqartoq:

Qulimiguulimmi inissat unammillernartut

- Nanortaliup nunaqarfii ukioq kaajallallugu umiarsuarmik sullinneqarsinnaannginnerat, qulimiguulimmilu inissat tamakkerlugit atorneqartarnerat patsisaavoq. Sapaatip akunneranut arlaleriarluni ullormi ataatsimi Nanortalimmut angallassisoqartarnissaanik pilersitsisoqarnissaa ilaatigut annertuumik pingaartinneqarpoq, tamannali qulimiguulimmi inissanut, angallassinissamilu pilersaarutit naleqqussarneqarsinnaanissaanut unammillernarpoq, Naaja Nathanielsen Anders Olsenimut allappoq.

Nathanielsenip ilaasunik angallassisoqarsinnaasannginnera 'naammaginannginnerarpaa'.

- Sumiiffinnut tamanut ukioq kaajallallugu angallassisoqartarnissaata qulakkeerneqarnissaa, Naalakkersuisut annertuumik pingaartippaat, taanna allappoq.

Anders Olsenip Naalakkersuisunut apeqqutigisimavaa qanoq iliuuseqartoqarniarnersoq, Naaja Nathanielsenillu ilisimatitsissutigaa naalakkersuisoqarfik aaqqiissutissarsiorluni suliaqartoq:

Kingusinnerpaamik aggustusimi aaqqiissutissarsisoqarnissaa naatsorsuutigineqartoq

- Taamaattumik naatsorsuutigaara, Nanortaliup nunaqarfiinut ukioq kaajallallugu angallassisoqartalernissaanut ilusissamik kingusinnerpaamik aggustip qaammataani saqqummiissallunga. Massakkut ingerlatsisunut isumaqatigiissutit iluini, ilutsimik nassaartoqarnissaa anguniarpara, angallassinissamili pilersaarutit, sumiiffimmilu tikitassat sinnerinut ullormi ataatsimi angallassisarnerit ilaatigut allannguiffigineqartariaqassasut ilimanarpoq, taanna allappoq.

Aningaasaliissutaareersut saniatigut aaqqiissutissaq aningaasaqarnikkut kinguneqassasoq paasinarsissappat, suliap lnatsisartut Aningaasaqarnermut Akileraartarnermullu Ataatsimiititaliaanit akuerisassanngorlugu saqqummiunneqassaaq.

Kiffartuussinissamik isumaqatigiissutit nutaat Naalakkersuisut siuliinit siorna novembarip qaammataani akuerineqarput. Isumaqatigiissutit nutaat taamanikkut illuatungiliuttuusunit isornartorsiorneqarsimapput, ilaatigut tamanut neqeroortitsisoqarsimannginnera pissutigalugu aamma isumaqatigiissutit nutaat ukiuni qulini atuuttussanngortinneqarsimanerat pissutigalugu.

Powered by Labrador CMS