Avatangiisinik isumannaarineq

Nunaqarfiit ajunaarnersuarmit eqqugaasut avatangiisaat isumannaarneqalerput

Nunaqarfiit marluk ajunaarnersuarmit eqqugaasimasut Illorsuit aamma Nugaatsiaq, atortutigut avatangiisinut ulorianaatillit sapinngisamik salinneqarnissaat illullu qajannaarneqarnissaat anguniarneqalerpoq.

Nuugaatsiami Illorsuarnilu saliisoqarnerani Issittumi Sakkutooqarfik isumannaallisaanermut akissussaasuussaaq.

Qaasuitsup Kommunia ulluni qaninnerni Issittumi Sakkutooqarfimmit ikiorneqarluni ingerlanneqassasoq, Namminersorlutik Oqartussat tusagassiuutinut nalunaarummi paasissutissiipput.

Qaasuitsup Kommunia Upalungaarsimanermut Aqutsisoqarfimmit tapersersorneqarluni nunaqarfinni suliassanik aqutsissaaq, kiisalu Issittumi Sakkutooqarfik suliat ingerlanneqarnerini isumannaallisaanermut akisussaasuussaaq, tamannalu 5. aamma 9. august ingerlanneqarnissaa naatsorsuutigineqarpoq.

Saliinermi avatangiisinillu isumannaallisaanermi aamma Nukissiorfinni, Tele Greenlandimi, KNI-mi, Royal Greenlandimi, Polar Oil-imi aamma Halibut Greenlandimi sulisut nunaqarfinni pineqartuni marluusuni atortuminnik isumannaallisaanissamut periarfissaqassapput.

Immami avatangiisit eqqarsaatigalugit ikummatissaasiviup, siusinnerusukkut Nuugaatsiap avannaani
sumiissusersineqarsimasup qaqinneqarnissaanik misiliinissaq suliassat ilagaat.

Tusagassiuutinut nalunaarummi Namminersorlutik Oqartussat paasissutissiarineqarpoq piffimmi qaqqamit nutaanik sisoortoqarluni tassaarsuarmik aallartitsisoqaqqissinnaanera suli ulorianaateqartoq. Taamaattumik nunaqarfiit pineqartut marluk suli ulorianartutut oqartussanit isigineqarput, nunaqarfinnilu innuttaasut utertariaqaratik.

Powered by Labrador CMS