Nunap immikkortortaanni mittarfiit kiffartuussinissamut isumaqatigiissutit akisunerulertissinnaagai
Kujataani Qeqertarsuullu Tunuani aqqutit angallaffiunerusuni mittarfiliortitsinerit kingunerisaannik kiffartuussinissamut isumaqatigiissut akisuneruleratarsinnaavoq. Angalasuniimmi isertitat appariassapput, kiffartuussisunilli aningaasartuutit maannatulli qaffasitsingissallutik.
Nunap immikkoortortaanni mittarfiliornissamut aningaasalersuinissamut periarfissat pillugit nassuiaammi innersuunneqanngilaq Qeqertarsuup Tunuani aamma Kujataani illoqarfinni minnerni mittarfiliornissaq.
Nunap immikkoortortaanni mittarfiit kiffartuussinissamut isumaqatigiissutinut akisunerulersitsissaaq, inerniliunneqarpoq.
- Angallaffiunerpaat qulimiguulinnik angallanneqartarunnaarsinneqarpata isertitat appapiluussapput, qulimiguulinnilli nunap immikkoortortaaniisitsinermi aalajangersimasumik aningaasartuutit qaffasissut nikissanngillat. Angalasartunit isertitat annikillinerisa kingunerisaanik nunaqarfiit ikinnerusut qulimiguulimmik tikinneqartalernerisa kingunerisaanik, kiffartuussinissami isumaqatigiissut akisuninngoratarsinnaavoq, allassimavoq.
Suliassap naammassineqarnissaanut aningaasartuutissat akilerneqarnissaannut isumaqatigiissutip aningaasartarai, soorlu sumiiffimmi qulimiguulimmik atugassaqartitsineq, qulimiguullip inaanik ingerlatsinermut attartornermulluunniit kiisalu timmisartortartunik mekanikerinillu sulisoqarneq. Namminersorlutik Oqartussat akiliutigisartagaasa annersaat, taakkununnga aalajangersimasumik aningaasartuutitut tuttartut, nassuiarneqarpoq.
Aningaasartuutit isertitallu nikerartut tassaapput orsussamut aningaasartuutit aamma angalasut billetsisinerannit isertitat.
Angallaffiunerusut pingaaruteqarput
Misissueqqissaarnerup erseqqissarpaa, kiffartuussinissamut isumaqatigiissutip oqimaaqatigiissinnissaanut sumiiffiit angallaffiunerusutut tunngaviliisuulluinnartut.
- Taamatut angallasseriaaseqarnermi nunap immikkoortortaani nunaqarfippaaluit sullinneqarnerini aningaasatigut annaasaqaataasartunut Narsarsuup, Qaqortup, Narsap Nanortaliullu akornanni kujataani angallaviunerpaasartuni isertitat oqimaaqatigiissitsisarput, nassuiaammi, Naalakkersuisut nunap immikkoortortaanni mittarfiliornissamut tulleriiaarinissamut Inatsisartunut siunnersuutigisassaannut tunngaviliisussami allassimavoq.
- Angallaffiunerpaat qulimiguulinnik angallanneqartarunnaarsinneqarpata isertitat appapiluussapput, qulimiguulinnilli nunap immikkoortortaaniisitsinermi aalajangersimasumik aningaasartuutit qaffasissut nikissanngillat.
Qulimiguullit innersuussutigineqarput
Nassuiaatip innersuussutigaa sumiiffinni angallaffiunerusuni qulimiguulinnik angallassinerit ingerlatiinnarneqassasut, angallaffiunerusuni isertitat, aningaasartuutinut matussusiinerusarnerat pissutigalugu, taamaasillunilu kiffartuussinerup maannatut inneranik attassisinnaatitsimmata.
- Misissueqqissaarnermi siullertut innersuussutigineqarpoq, Qeqertarsuup Tunuani kujataanilu qulimiguulinnik angallassisarnerup attatiinnarneqarnissaa anguniarneqassasoq.
Kiffartuussinissamut isumaqatigiissut 2021-mi atuutilertussaq isumaqatigiissutigalugu ukioq manna naammassineqassaaq.
Aningaasaqarnermut Naalakkersuisoq, Vittus Qujaukitsup, aningaasanut inatsit 2021-moortoq saqqummiukkamiuk oqarpoq nunap immikkoortortaanni mittarfinnut tunngasumik suliaq 2021-mi aallartinneqassasoq, aningaasanulli inatsimmut 2022-mut ilanngunneqarumaartoq.