Nunap iluani sulinngiffeqarluni angalanerit Visit Greenlandip suli kaammattuutigai
Staycation Kalaallit Nunaanni aamma atorluarneqarpoq, Visit Greenlandillu nunatta iluani takornariarluni angalanissamik siunertaqartitsisussaq suliniutaa, Nunarput Nuan, aamma nuannarineqarluarpoq.
Nunap iluani misigisassarsiorluni angalanerit nunatsinni najugaqartunit soqutigineqarluarput. Visit Greenlandimi pisortaq, Julia Pars Sermitsiaq.AG-mut oqaluttuarpoq.
- Periarfissat taama ittut nunap iluani misiginikuunngisanik immikkuullarissunik misigisaqarnissamik aamma periarfissiipput, Julia Pars oqaluttuarpoq. Taanna ilaquttani ilagalugit kujataani aasaq manna angalasimavoq.
- Najugaqartut nunap iluani takornariatut angalarusussuseqarnerat ajunngilluinnarpoq. Inuussutissarsiummut tapertaalluarput, Julia Pars oqarpoq.
Visit Greenlandip suleqatigisaminit ilisimatinneqarnini aallaavigalugu naatsorsorpaa angalatitsinerit misigisassarsiornernik immikkut imaqartut 100-likkuuttaat maajimiilli tunineqareersimasut. Visit Greenlandip suliniutaa nunaqavissut nunap iluani angalanerunissaannut soqutiginninnerulersitsisimavoq.
Takornarialerinerup iluani nioqqutissat timmisartuussinerillu akikilliliivigineqarnissaat anguniarlugu Naalakkersuisut aamma suliniutiminnik aasaq manna saqqummiussaqarput. Suliffeqarfiit tapiissutisinissamut periarfissinneqarput, sammisassatullu nioqqutit akikillineqarsinnaalerlutik.
Nunarput misigisaqarfigineruguk
Visit Greenlandimi pisortap Julia Parsip nunani allani nunagisami takornariatut angalaneq takornartaanngitsoq oqaatigaa.
COVID-19 nunatsinni nappaatigineqaqqaalermat, nunarsuarlu tamakkerlugu tunillaassornerup nunarput sunnermagu, takornarialerisunut angalatitseqatigiiffinnullu pisut ajorluinnarsimapput. Staycationilli atorneqarnera inuussutissarsiornermut sunniuteqalaarpoq.
Travel By Heart - Greenlandip piginnittua naapertorlugu, nunap iluani angalatitsinerit naatsorsuutigisamit ingerlalluarnerupput.
Julia Pars kaammattuivoq nunap iluani misigisassarsiorluni angalanerit ingerlanneqaannassasut.
- Visit Greenland kaammattuivoq nunap iluani angalatitsinerit nioqqutigineqartut atorluarneqaannaqqullugit, inuussutissarsiuteqartut suliaqaannarsinnaaniassammata. Sinersorluni takornariartaatit tikittaleraluarpataluunniit, saniatigut nunaqavissunut nioqqutinik neqerooruteqarnissap atuutiinnarnissaa takorloorsinnaavarput, oqarpoq.
Sinersorluni takornariartaatit ukioq manna nunatsinnukanngitsoorput.