Nunap iluani assartuineq ajornannginnerusoq

Kalaallit Nunaata iluani poortukkanik nassiussanillu assartuineq akisuvallaaqaaq pisariuvallaarlunilu. Tamanna sumiiffinni nerisassanik suliffissuarnilu tunisassiortunut akornutaavoq. Assersuutigalugu Kujataani nunalerisut, aalisartut Karl Bejderillu ujaqqanik tunisassiortup ukiorpassuarni pissutsit isornartorsiorsimavaat.
Siumumi Inatsisartuni politikkikkut oqaaseqartartup Karl-Kristian Krusep tamanna ililuuseqarfigeqquvaa.
Paragraf 37 naapertorlugu Naalakkersuisunut apeqqutigaa Royal Arctic Linep Nunatta iluani angalasarnerata allanngortinnissaa pilersaarutigineraat.
– Kalaallit nunaanni inoqarfinniik inoqarfinnut assartuinermi ullumikkut pisariuallaartumik eqqarsartaasera malillugu ingerlatsisoqarpoq. Assersuutigilara Uummannamiik Ilulissanut nassiussigaanni Nuummukaqqaarlutik avannaanut uteqqillutik aatsaat apuutissapput. Nuup umiarsualivia amigartoq oqallisaajuarpoq pisariaqanngittunik qaavatigut immeqqittaaginnarneqarsinnaanngilaq, Karl-Kristian Kruse naliliivoq.
Taamaattumik Naalakkersuisunut apeqqutigaa Royal Arctic Linep nunap iluani toqqaannarnerusumik sukkanerusumillu nassiussanik angallassisalernissaanut pilersaaruteqarnersut. Kiisalu kiffartuussinissamut isumaqatigiissusiornermi imminut pilersornerup siuarsannissaanut assartuinikkut Naalakkersuisut qanoq pilersaaruteqaranersut.
Tunngavilersuummini allappoq Imminut kalaallit pissarititaannik pilersorniarnermi kujataaniik avannaaniik kitaanilu assartuinermi toqqaannarnerusumik kalaallit pisuussutaat kalaalimernit kalaallit naatittagaat nutaatillugit apuunneqarsinnaalertuuppata inuiaqatigiinni imminut pilersorniarnitsinni annertuumik iluaqutaallunilu siuariaataasussaammat.
– Taamaattumik isumaqarpunga assartuussinermik nutaamik aaqqissuunneq nunap iluani nassiussanut iluaqutaassasoq, Karl-Kristian Kruse oqarpoq.