Nunap ikuallannera arlalinniit qaminniarneqarpoq
Qatserisartut 30-t missaanniittut illoqarfinnit arlalinnit Sisimiut avannaata kangianut Kangerluarsuk Tullermut nunamut ikuallattumut qamitsiniaajartorput, tamanna qaammat ataaseq sinnerlugu ikuallappoq.
Kangerluarsuk Tullermi ikuallattoq qatserisartunit arfineq-marlunnit Maniitsumeersunit aamma Siusimiuneersunit qulinit suli qaminniarneqarpoq. Qatserisartut allat qulit Ilulissanit, Qasigiannguanit, Aasiannit aamma Kangaatsiamit unnuap ingerlanerani tikipput, ikuallattumik qamitsiniartunut ikiuukkiartortunit. Kajumissutsiminnik qatseriartortut qulit aamma ikiuupput.
Qeqqata Kommunia Facebookimi quppernermini taama nalunaaruteqarpoq.
Kangerlummi illuaqqat maannamut isumannaarneqarsimasut, Qeqqata Kommunia nalunaaruteqarpoq.
Danmarkimit ikiorsiineq
Nunatsinni upalungaarsimanermut ataatsimiititaliarsuup Danmarkimit ikiorsiisoqarnissaanik innersuussuteqarnera Naalakkersuisut sapaammi unnukkut akueraat, Danmarkimit qatserisartut 30-t tikisinneqassallutik, taamaalillutik qamitsiniarnermut ikiuutissammata.
Ikuallattumit pujoq illoqarfimmut pissappat, Sisimiuni innuttaasut illup iluaniinnissaat nakorsaanerup aamma nalunaarutigaa. Kisianni putsup ulorianartorsiortitsinnginnera naqissuserpaa.
Namminneq kajumissutsiminnik ikiuussimasut tamarmik, ilaatigut nerisassatigut, qatserisartunik ikiuunnikkut, minnerunngitsumillu piffissami sivisuumi qatserisartut ikuallattumik qasussuillutik qamisaanermik ingerlatsisimasunut, borgmesteri Malik Berthelsen qujassuteqarpoq, Qeqqata Kommunia Facebookimini allappoq.