kortlægning

Nunap assiliornermi Sydkorea ikiuukkumavoq

Kalaallit Nunaannut nunap assingata nutarterneqarnera suliarineqarneralu suliassaq annertoorujussuuvoq. Maanna Sydkorea suliassamut neqerooruteqarpoq

Ineqarnermut Naalakkersuisoq Siverth K. Heilmann Sydkoreameeqqammerpoq.

– Pitsaasorujussuuvoq Kalaallit Nunaata nunap assiliorneranutr Sydkorea ikiuukkusummat. Tamatta nalunngilarput Kalaallit Nunaannut nunap assingi pisoqalisimasut eqqunngitsortaqarlutillu. Nunap assingi naammaginanngitsut ullumikkut suliffissuaqarnerup ineriartornissaanut akornutaapput, kangerlunnilu angallammik angalaneq pinngortitamilu pisuttuarneq ulorianartoqarsinnaapput. Geodata-mi teknikkikkut nutaamik paasisat uagutsinnut kalaallinut iluaqutaasorujussuusinnaapput ineriartornermullu ikiuutaasinnaallutik. Nutaamik nunap assiliornermik suliassaq annertoorujussuuvoq. Nunap assiliornera Danmarkip suli oqartussaaffigaa taamaattumillu Danmarkimik ataqatigiissaarisoqassaaq. Taamaattumik nunatsinnit sulissutiginiarparput nunat pingasuulluta ataatsimiinnissarput, takuniarlugu Sydkoreamik suleqateqarnissaq piviusuunerusoq isumaqatigiissutigisinnaanerlutigu.
Taamatut oqarpoq ineqarnermut Naalakkersuisoq Siverth K. Heilmann, Atassut, taannalu Sydkoreami Seoul-imi nunat tamalaat geospatial-imik ataatsimeersuarneranni peqataaqqammerpoq.
Tamanna pivoq tusagassiorfinnut nalunaarutikkut, tassuuna Siverth K. Heilmannip paasissutissiissutigalugu Sydkoreap naalakkersuisuinit qaaqquneqarsimalluni Kalaallit Nunaat sinnerlugu ataatsimeersuarnermi Smart Geospatial 2nd High Level Forum 2013-imi peqataanissaanut. Angalanermi peqatigaa Asiaq.
Ataatsimeersuarnermi Siverth K. Heilmannip saniatigut Sydkoreami Ministeriet for Land, Infrastruktur og Transport-imi ministeri Hr. Seo Seung-hvan, nunap assiliornermut geospatiale-llu ineriartorneranut akisussaasoq, ataatsimeeqatigaa. Ataatsimiinnermi ministerip neqeroorutigaa Kalaallit Nunaata nunap assiliornerani kiisalu piginnaassutsinik ineriartortitsinermi taarseeqatigiinnermilu ikiuukkumalluni.
Sydkoreamiut nunattalu atorfilittaasa ataatsimiinneranni paasinarsivoq nunap assiliornermut Sydkorea teknikkikkut siuarsimanerujussuusoq. Allaat satellitsikkut assilisat immikkoortorpassuallit nunap assiliornemi atorneqarsinnaapput - tamatumani 3D kort ilanngullugu. Apps-it smartphones-inut naleqqussarneqarsinnaallutik, nunatsinni pissutsinut naleqqussarlugit taamasillunilu nunap assiliornermi paasissutissanik innuttaasut akulerutsinneqarsinnaallutik.
Sydkorea ukioq manna siusinnersuukkut Issittumi Siunnersuisoqatigiinni alapernaarsuisutut ilaasortanngorsimavoq, taamaattumik Sydkorea nunarsuup immikkoortuani sammisaqarnerorusuppoq ikiuukkusullunilu. Sydkorea ineriartupiloornermini nuna peqissaartumik nunap assiliorsimavaa, ilaatigut nutaaliarujussuaq 3D-mik nunap assiliorneq atorlugu suliffissuaqarnerup ineriartornera taperserlugu.
Kalaallit Nunaat ataatsimeersuarnermi nunat allat 27-it ilagalugit peqataavoq. Taamaasilluni nunatsinnit aallartitat ataatsimeersuarnermi aamma Chilemit Nepalimillu aallartitat kiisalu sydkoreami geospatiale-mik selskabit universitetillu assigiinngitsut ataatsimeeqatigaat.

Powered by Labrador CMS