ukiumut naatsorsuutit
Nunaoilip millioninik amigartooruteqarluni 2014 anigorpaa
Nunaoilip ukioq 2014 millioninik amigartooruteqarluni anigorpaa, ilimagisanit amigartoorutit 2,2 millioner koruuninik ikinnerullutik
Nunatsinni uuliasiornermik aallutaqartoq, Nunaoil, ukioq 2014-imik aniguivoq 6,7 millioner koruuninik amigartooruteqarluni, ilimagisanit amigartoorutit 2,2 millioner koruuninik ikinnerullutik.
Tamatumunnga pissutaanerpaallutik missingiuutini ilaatinneqanngitsunik sajuppillatsitsinikkut paasissutissanik katersanik tunisaqarneq aammalu aningaasartuutitigut sipaarniutit atuutsinneqalernerat, taama Nunaoilip pisortaanera, Hans Kristian Olsen ilisimatitsivoq.
Ingerlatseqatigiiffik sajuppillatsitsinikkut paasissutissanik katersanik siusinnerusukkut tunisaqangaatsiartarsimavoq. Ukiunili kingullerni sajuuppillatsitsilluni paasissutissanik katersineq aningaasaliiffigineqarsimanngimmat, paasissutissanik tunisaqarnissaq ilimagineqanngilaq taamaattumillu ingerlatseqatigiiffik sinneqartooruteqarnaviarnani, Hans Kristian Olsen allappoq.
Atuaruk: Aqutsisoqarfimmi pisortaq Nunaoilimi siulittaasunngussaaq
Atuaruk: Nunaoilimi aalassassimaartoqarpoq: Siulersuisut ingerlaannartumik tunuartut
Aapriilimi ataatsimeersuassapput
Nunaoil A/S-p siulittaasorisimasaa, Frank D. Pedersen, siulersuisunit oktobarimi siorna tunuarpoq. Tamanna pivoq Frank D. Pedersenip Naalakkersuisut siulittaasoqarfianik Nunaoilip 2017-imiit tapiissuteqarfigineqaqqulluni kissaateqartareernerata kingorna.
Frank D. Pedersenip tunuareernerata kingorna, siulersuisunut ilaasortaq ataaseq minillugu, siulersuisut sinneri ingerlaannartumik atuutilersumik aamma tunuarput.
Siulersuisuni ilaasortat ataatsikkut oktobarimi siorna aniareernerisa kingorna Naalakkersuisuungallartut Nunaoilimi siulersuungallartussanik, aapriilillu 22-ata tungaanut ileqquusumik ataatsimeersuarnissap tungaannut atuukkallartussanik toqqaapput.
- 2014-imi oktobarimi taamanikkut siulersuisuusut tunuarnissartik aalajangiuppaat, piginnittuusup kissaatigisai ingerlatseqatigiiffiullu siunissami aningaasaliiffigineqarnissamik pisariaqartitsinera pillugu pissusilersornera naammagittaalliuutigalugu, taamanikkut siulersuisuusut isumaqaramik inuiaqatigiit uuliasiornermik ingerlatsiviattut inississimanerup nassatarisaanik akisussaassuseqarnerup naammaginartumik naammassiniarnissaanut naleqqutinngitsut. Siulersuisuni kiserngoruttutuaq tassaalluni qallunaat naalagaaffiata sinniisaa, siulersuisut naliliinerannik aalajangernerannillu isumaqatiginnilluni nalunaarsimasoq, qallunaalli naalagaaffiannit inissitaasutut tunuarsinnaasorinani, Nunaoil paasissutissiivoq.
Nunaoilip ilimagaa 2015-imi 8,2 millioner koruuninik amigartooruteqarnissani.
Atuaruk: Nunaoil: IA-p partiit siulittaasui ataatsimeeqatigiitsikkusuppai
Atuaruk: Nunaoil: Siulersuungallartussat ivertinneqalerunarput