Nunanut avannarlernut ministerip Nunani Avannarlerni Siunnersuisoqatigiinnut tamakkiisumik ilaasortaasinnaaneq pisinnaannginnerarpaa
Savalimmiut Kalaallilluunniit Nunaat Nunani Avannarlerni Siunnersuisoqatigiinnut tamakkiisumik ilaasortaasinnaanngillat. Nunat avannarliit suleqatigiinnerannut ministerip Flemming Møller Mortensenip (S) nassuiaat tunngavigalugu oqallittoqareersoq tamanna erseqqissaassutigaa.
Savalimmiut Kalaallillu Nunaat Nunani Avannarlerni Siunnersuisoqatigiinnut tamakkiisumik ilaasortaanngillat, oktobarillu 14-iani nassuiaat tunngavigalugu folketingimi oqallittoqarmat, Christian Juhlip (EL) paaserusussimavaam nunat taakku tamakkiisumik ilaasortanngortinneqarnissaat piffissanngunnginnersoq.
Suleqatigiinnermut ministerip tamanna periarfissaannginnerarpaa.
- Christian Juhlip tunngaviusumik inatsit Helsingforsimilu isumaqatigiissut avaqqunneqarsinnaanersut apeqqutigimmagu oqaatigiinnarsinnaavara, taakku avaqqunneqarsinnaanngimmata, Flemming Møller Mortensen oqaluttarfimmiit oqarpoq.
Sisamariarluni misiliisoqarsimasoq
Savalimmiut Nunani Avannarlerni Siunnersuisoqatigiinnut tamakkiisumik ilaasortanngorniarluni sisamariarluni misiliisimavoq. Tamatuma pisinnaannginneranut Helsingforsimi isumaqatigiissut nalinginnaasumik tunngavilersuutigineqartarsimavoq. Isumaqatigiissut malillugu naalagaaffiit kisimik ilaasortanngorsinnaammata.
2016-imi Savalimmut tamakkiisumik ilaasortanngornissaanu danskit tunngaviusumik inatsisaat aporfiusimavoq. Nunani Avannarlerni Siunnersuisoqatigiit siulittaasoqarfiata taamanikkut oqaatigisimavaa, Savalimmiut Danmarkilu aaqqiissutissarsiortariaqartut.
Maanna ukiut tallimat qaangiunneranni Flemming Møller Mortensenip oqaatigaa, tamakkiisumik ilaasortanngorsinnaaneq arlaleriarluni misissorneqartarsimasoq, tamatigullu inerniliunneqartarsimalluni Helsingforsimi isumaqatigiissut tunngaviusumillu inatsit aporfiusut.
- Arlaleriarluni oqaatigineqartarpoq sinaakkusiussat aporfiusut. Tunngaviusumik inatsisitsinni oqaasertaliunneqarsimavoq, naalagaaffeqatigiit sinnerlugit kina oqaaseqartuusassanersoq, Flemming Møller Mortensen Det Færøske Nyhedsbureaumut nassuiaavoq.
Periarfissat allat ammaffigineqartut
Flemming Møller Mortensenip aamma oqaatigaa, inatsisip tunngaviusup iluani periarfissat naapertorlugit Savalimmiut Kalaallillu Nunaata Nunani Avannarlerni Siunnersuisoqatigiinni sunniuteqarnerusinnaanerat sulissutigineqarusuttoq.
Savalimmiuni lagmandimut oqaatigisimavaa, tamatuma qanoq iliuuseqarfigineqarsinnaaneranut Savalimmiunit isumassarsianik tusarusulluni.
- Savalimmiuni kissaatigineqartut paasilluarsinnaavavu, sunillu periarfissaqarnersoq pillugu misissuinissamut peqataarusuppugut, Flemming Møller Mortensen naggasiivoq.