Nunanut allanut unammisartut unamminermi siullermi 2-2-rput

Arsaannermi nunanut allanut unammisartut Bermudami Island Games-imut aallannginnerminni Danmarkimi sungiusaqatigiinneq aallartillugu pingasunngormat ualikkut Odense-mi Næsby unammivaat. Unnugu unammeqqissapput

Nunanut allanut unammisartut. Knud Fl. LarsenNunanut allanut unammisartut sungiusaasui marluk, normu 10-uvoq Maasi Maqe. Knud Fl. LarsenPiffissap ilarujussua Næsbyp målia qaninngaartarpaat. Knud Fl. LarsenFrederik Funch marlunnik isertitsivoq. Knud Fl. LarsenJohan Bidstrup hjørnesparkerpoq. Knud Fl. Larsen

Nunanut allanut unammisartut Odense-miinnerminni Kalaallit Illuutaanni najugaqartut pingasunngormat unnuakkut aatsaat nalunaaqutaq 02.00 Odensemut tikipput. Ullaap tungaani sungiusaraluarlutik aammalu holdimi unammisartut nutaat amerlagaluartut nunanut allanut unammisartut piffissap ilarujussuani arsarluaqaat.
Nunanut allanut unammisartut sungiusaasuisa René Olsenip Tekle Ghebrelul-illu unammisartui aallartinnerliulaaraluariarlutik, Næsby-p unammisartuisinit nukittunerusunit tamaviaartinneqarlutik, saassussillattaalerput arlaleriarlutillu målingajattarlutik. Angerlarsimasulli Næsby-meersut minutsit 35-t ingerlareersut isertitsipput 1-0-mik siuarlutik. Unamminerup immikkoortuata sinnerani taamaaginnarput.

Unamminerup immikkoortuata aappa
Unamminerup immikkoortuata aappa aallartiinnavissoq Kalaallit Nunaat isertitsingajavippoq. Næsby-lli målmandianit arsarluaqisumit annaanneqarpoq. Minutsialunnguit kingorna Frederik Funch 1-1-imut isertitsivoq. Minutsit 20-t qaangiuttut Frederik Funch isertitseqqippoq Kalaallit Nunaat 1-2-mik siuartillugu, unamminerullu naammassinissaanut minutsit qulingiluat sinneruttut Næsby 2-2-mut isertitsivoq.
Unamminerup kingorna sungiusaasut marluk arsaattumik arsarnerat naammagisimaarluarpaat.
– Soorunami sakkortoqaaq akunnerni sisamaannarni sinissimagatta. Aamma eqqaamassavarput Næsbymi unammisartut unammiuaarnermi sivisuumi amerlasoorpassuariarlutik unammisarsimammata, René Olsen unamminerup kingorna Sermitsiaq.AG-mut oqarpoq.
Marlunnik isertitsisoq Frederik Funch unammilluartorujussuuvoq, Næsby Boldklub-illu pisortaannit takkussimasunit kakkagineqaqaluni, soorlu ilaat oqartoq:
– Atorsinnaalluarparput.
Næsbymi unammisut klubbip 2. divisionimi unammisartuineersunik kakkannernik ilaqarput klubbillu holdiinit allanit ilaneqarsimallutik. Danmarkimi arsaattartorpassuit sæsonip sivisuup kingorna piffissami matumani feriarput.

Tullianik Odense KFUM unammissavaat
Kalaallit Nunaat ullumi sisamanngornermi unammeqqissaaq, tassani qanga angusarissaartarsimaqisoq maannalu serie 1-imi unammisartoq Odense KFUM unammissavaat. Unammineq pissaaq KFUM Park-imi nalunaaqutarlu 18.00 aallartissaaq.

Powered by Labrador CMS