Nunanut allanut unammisartut svenskimik sungiusaasortaarput
Assammik arsarnermi sungiusaanikkut misilittagaqarluartoq, Sverigemit Johan Zanotti, assammik arsarsartut nunanut allanut unammisartut angutitaannut sungiusaasunngorpoq.
49-nik ukiulik Johan Zanotti Timersoqatigiit Assammik Arsartartut Kattuffiannit nunanut allanut unammisartuni sungiusaasutut atorfinitsinneqarpoq.
- Kalaallit nunanut allanut unammisartuinut sungiusaasunngornera nuannareqaara, suliassaq pissanganartuuvoq, unammisartut suleqatigilernissaat qilanaaraara, Johan Zanotti Sermitsiaq.AG-mut oqarpoq.
Johan Zanotti sungiusaasutut misilittagaqarluarpoq, tassami nunani avannarlerni timersoqatigiiffiit assigiinngitsut sungiusaasuuffigereerpai, norskit aamma svenskit inuusuttuinut aamma nunanut allanut sungiusaasuunikuulluni.
Kalaallinut unammeriaasissaat
- Kalaallinut tulluartumik unammeriaaseqalernissaa sulissutigissavara. Imaassinnaasoq unamminerit tamaasa ajugaasassasugut, taamaattoq unammisartut tulluusimaarutigisassavaat ilumut nunanut allanut unammisartuullutik, Johan Zanotti oqarpoq.
Nunarsuarmi pissartanngorniunnissamut peqataanissaq anguniarpaa.
- Anngussinnaassagutta nuannissaqaaq. Taamaattumik VM-imut anngunnissaq oqallisigineqartuartariaqarpoq, tassami anngunnissamut periarfissaqarluartoqarpoq. VM-imut anngunnissaq kinaassusitsinnut ilaassaaq, oqarpoq.
Johan Zanotti ukiuni pingasuni isumaqatigiissuteqarfigineqarpoq, Akutaaneq Kreutzmann unammisartuujutigaluni sungiusaasutut tullersortaassaaq.
Suleqatigiinnissaq qilanaaraa
- Johan Zanottip suleqatiginissaa qilanaaraara. Misilittagaqarluarpoq, unammisartunut tunniussaqarluarsinnaasoq nalunngilara. Unamminermi illersuinikkut saassussinikkullu pissanganartunik anguniagaqarpoq. Unammisartutsinnut tulluartumik unammeriaaseqartoqalernissaa anguniagaavoq, Akutaaneq Kreutzmann oqarpoq.
Nunanut allanut unammisartuunissaq pissanganartuusoq oqarpoq.
- Unammisarfiup iluani avataanilu unammisartut unammisartuunertik tulluusimaarutigissavaat. Tujuuluaqqami Nunatta Erfalasua ataqqineqassaaq. Unammisartut katerisimaaqqinnissaat qilanaaraara, Akutaaneq Kreutzmann oqarpoq.
Unammisartut inuusuttut nutaat maanna ujartorneqalissapput, katerinnissat mikinerusut pilersaarusiorneqalissapput - taannalu kingorna unammisartut katerinnissaat sulissutigineqalissalluni.
- Timersoqatigiiffinnik aamma attaveqarneq aallartissaaq, taamaasilluni sungiusarneq nuannernerusumik ataavarnerusumillu ingerlanneqartalernissaa anguniarneqassalluni, nalunaarutigineqarpoq.