Nunanut allanut unammisartut Spaniami sungiusaatigalugu unammissapput
Assammik arsarluni nunanut allanut unammisartut Nava De La Asunciòn sungiusaatigalugu unammissavaat ullumi. Unammineq nittartakkakkut takuneqarsinnaavoq
Kalaallit assammik arsarlutik nunanut allanut unammisartui sisamanngormat ualisoq Madridimut apuupput, mittarfimmiillu illoqarfimmut mikinerusumut Nava-mik atilimmut nal.ak. marluk atorlugit sungiusarfissaminnut ingerlaqqillutik.
Sungiusaqatigiinneq ullunik qulingiluanik sivisussasuseqartussaq Amerikap nunavittaani pissartanngorniunnissamut Nuummi piffissami 16.-24.juni ingerlanneqartussamut piareersaataavoq.
- Nunanut allanut unammisartut 19-inik arsartoqartut sungiusarnissamut pilersaarutit malillugit ullormut marloriarlutik sungiusartarnertik ingerlappaat, maannamullu ajoqusertoqanngitsoq tangiartuisartup Berit Duus-ip nalunaarutigaa.
Sungiusaatigalugu unammissaq pilersaarutaasoq siulleq pissaaq marlunngorneq 5.juni, unammssallugit illoqarfimmi sungiusarfigisaanneersut Nava De La Asunciòn. Sisamanngorneq 7.juni sungiusatigalugu unamminerit aappaat ingerlanneqassaaq, tassanilu unammineqassapput immikkut toqqartukkat Valladolidimeersut. Unammineq internetikkut isiginnaarneqarsinnaassaaq.
Nunanut allanut unammisartut Nunatsinnut angerlarunik sungiusarnertik Nuummi nangissavaat 11.juni pissaratanngorniussap aallartinnissaata tungaanut.