Nunanut allanut unammisartup futsalerneq salliuppaa

B-67-imi arsaattartoq Patrick Frederiksen futsalimi silamilu arsaannermi nunanut allanut unammisartuuvoq.

Futsalimili ineriartornerunissani anguniarlugu silami nunanut allanut unammisartunut peqataaniarnani aalajangerpoq. Arsaalluni silami nunanut allanut unammisartut Tyrkiamut qaammammi matumani sungiusaatigalugu unammiartussapput.

Futsalimi ineriartornissaq

- Futsalimi ukioq kaajallallugu sungiusarsinnaavugut, illup iluani unammisaratta sila apeqqutaatinnagu sungiusarsinnaalluta. Unammisartoqatikka allat peqatigalugit eqqarsalernikuuvugut qanoq suli ineriartornerusinnaanerluta, nunanummi allanut unammisartakkatta pisinnaasaat tikinnerorusupparput. Futsalerneq aallunneruniarlugu aalajangerparput, ukioq mannalu sungiusarnerput ukiunit allanit sanilliullugu aallartiaarnerullugu, Patrick Frederiksen Sermitsiaq.AG-mut oqaluttuarpoq.

Arsaattartut kattuffianni KAK-mi siulittaasup Benjamin Kielsenip Patrick Frederisenip oqaasiinut isumaqataavoq.

- Futsalertarneq kalaallinut tulluarneruvoq, nunaniimmi allanit sivisunerusumik ukiuusarpoq. Silami GM-ertoqarnerani futsalertarneq sunniuteqarluarsimasoq takuneqarsinnaavoq, teknikkitigut unammisartut pitsaanerulersimasummi takuneqarsinnaavoq, Benjamin Kielsen Sermitsiaq.AG-mut oqarpoq.

Aalajangiisariaqalerneq

Silami arsaanneq naammassigaangat futsalimi arsartariaaseq sungiunniaqqaarnartartoq Patrick Frederiksenip oqaatigaa.

- Nunanut allanut unammiartoraangatta, assersuutigalugu oktobarimi, futsalimi unammisarneq suli sungiuppiarnikuunagu unammisarpugut. Futsalimi suli pitsaanerulerusuppugut. Nunani allani unammisartakkagut ukioq kaajallallugu sungiusartarput, pitsaassusaat tikissagutsigit taamatut aalajangertariaqalersimavugut, oqarpoq.

Silami pimoorusserusunnerusunik aamma arsaattartoqartoq Benjamin Kielsenip oqaatigaa.

- Unammisartut ataasiakkaanut una tunngassuteqarneruvoq, KAK-mit aalajangersuisinnaanngilagut unammisartut futsal silamiluunniit unammisartuunissaq toqqassagaat, oqarpoq

Futsalimi ineriartorluartoqarnerusoq oqaatigaa, silamilu unammisarneq aatsaat aallartisariartulerluni.

- Silami arsaattarnermi periarfissat ikinnerupput, nunanat unammineqarsinnaasut aamma killeqarnerullutik. Silami unammisartunut ineriartortitseqataarusukkaluarpunga, taamaattoq maani sivikinnerusumik tamanna periarfissaavoq. Taamaattumik futsal aallukkusunneruara. Aamma futsalimi unammissagutta Uefami ilaasortaaqqaartariaqanngilagut, akerlianik silami unammineqarsinnaasut killeqarnerujussuullutik, Patrick Frederiksen oqarpoq.

Assersuutigalugu oqaatigaa futsalimi nunanut allanut unammisartut Belgiamiunut Polenimiunullu unammereernikuupput, kiisalu futsalimi U19-mi unammisartut nunanut assigiinngitsunut unammeqqammerlutik. Silami nunanut allanut unammisartut Danmarkimi klubbinut unammikuullutik. Maannali silami ineriartortitsineq aallartilaarpoq, Kosovo qaammammi matumani unammineqassalluni.

Ilaasortanngornissamik suliniuteqarneq

Kalaallit Nunaata arsaannermut kattuffimmut, Concacaf-imut, Nordamerikamiunit, Mellemamerikamiunit Caribiamiunillu ilaasortaaffigineqartumik, ilaasortanngornissaq sukataarutigineqartoq Benjamin Kielsenip oqaatigaa.

- Concacaf-imili qaqugu ilaasortanngornissarput suli ulluleruminaappoq. Aamma Concacaf-ip aalajangertussaavaa ilumut ilaasortanngorsinnaanersugut. Silamili nunanut unammisartut suli inerisarneqassapput, ilaatigut aappaagu Island Gamesimut peqataatitaqartussaavugut. Taamaattoq Island Gamesimi peqataaneq ajortunut aamma unammisassaagut, Concacaf-immi takusinnaasariaqarpaa nunanut allanut unamminernut peqataalluarsinnaasugut. Taamaattumik Concacaf-imi ilaasortanngornissarput neriuutigaarput, Benjamin Kielsen oqaluttuarpoq.

Silami arsaattarneq toqqarsimasinnaagaluaraa

Silami arsaannerup tungaatigut periarfissaqarnerusuuppat aallunnerusinnaagaluarlugu Patrick Frederiksen oqarpoq:

- Arsaaffiit qulisat ukioq kaajallallugu sungiusarfigineqarsinnaasut amigaataapput. Islandimisut periarfissaqartuugutta sungiusaannaavissinnaagaluarpugut ineriartuunnaavillutalu. Maannakkulli periarfissat ikippallaarujussuarput.

Qulisamik arsaattarfeqalernissaa Benjamin Kielsenimit neriuutigineqarpoq.

- Taamaattoqarpat nunatsinni arsaattarneq pitsaasumik ineriartulissagaluarpoq. Inatsisartut qulisamik arsaattarfittaartoqarnissaa misissorneqarpaat. Aamma Ilulissani assingusumik pilersitsinissamik anguniagaqartoqarpoq, taamaammat arlaalluunniit iluatsinnissaat neriuutigaara.

Anguakkat arlallit

Maanna tassa futsalimik aallussinerulissaaq, unammersuaarnernilu anginerusuni peqataaqataanissani siunnerfigaa.

- VM-imut EM-imulluunniit peqataarusuppunga, aamma nunanut allanut assigiinngitsorpassuarnut unammeqattaarusuppunga. ’Futsal Week’-imut marloriarluta ukioq manna peqataassaagut, Patrick Frederiksen oqarpoq.