Nunanut allanut unammisartunut sungiusaasup Pan Am-imut toqqaanini illersorpaa
Assammik arsarnermut ilisimasallip Ulf Abrahamsenip nunanut allanut unammisartut Pan Am-imut toqqarneqartut tallimat apeqqusernikuuai. Unammisartut sungiusaasuata Ingi Olsenip toqqakkani illersorpai - inuusuttut aamma peqataanissaat pingaartillugu naqissuserpaa
- Frank Krone Mikkelsen peqataaniarnani nalunaarnikuuvoq, taamaattumik Pan Am-imut peqataasinnaanngilaq. Gustav Ostermann Egede atuarfimminut tunngatillugu misilitsittussaagami aamma peqataasinnaanngilaq.
Nunanut allanut unammisartut sungiusaasuat Ingi Olsen Sermitsiaq.AG-mut oqarpoq. Pan Am-eqataasussatut toqqarsimasai najoqqutagalugit Ulf Abrahamsenimit isornartorsiorneqarpoq, ilaatigut unammisartut marluk qulaani taakkartorneqartut peqataasimasinnaagaluarneri oqariartuutigalugu.
Ulf Abrahamsenip unammisartut aalajangersimasut taavai Pan Am-imut sooq toqqagaasimanersut apeqquserlugu. Taama isornartorsiuineq Ingi Olsenimit ima qisuariarfigineqarpoq:
- Pitsanngoriartuinnarnissaq anguniagaraarput. Unammiartoraangatta inuusuttunik peqataatitsisarpugut, taakku siunissamut neriunaateqartarmata, Ingi Olsen oqarpoq.
Pan Am-imi illersuisarnissat pingaaruteqartut isumaqatigaa.
- Misilittagaqarnerit akisussaaffimmik tigusinerujussuusussaapput, kisianni pingaaruteqarpoq siunissamut peqataasalersussanik toqqagaqarnissaq, tassami misilittagartunerit qaqagorsuarmut unammisartuunavianngillat. Inuusuttut misilittagaqalernissaat pingaaruteqarpoq. Inuusuttut GM-ertoqarnerani takutitsilluarput, taakkununngalu isornartorsiuineq paasisinnaanngilara, Ingi Olsen oqarpoq.
Inuusukaat peqataasussat akisussaaffimmik angisuumik tunisinnavianngitsut oqaatigaa.
- Tassa misilittagaqalernissaat ilaatigut pissutigalugu peqataatitsivugut. Unammisartut toqqarneqartut tamarmik sungiusarnermi takutitsilluarput. Sungiusaqatigiinnermi aamma takusat aallaavigalugit toqqaavugut, unammisartullu tamarmik tatigineqaramik toqqagaapput, Ingi Olsen oqarpoq.
Nunanut allanut unammisartut sungiusaatigalugu Spaniamut unammiartussapput sisamanngorpat. Tassani Pan Am-imi peqataasussat toqqarneqassapput.