Nunanut allanut unammisartoq: TV-ikkut isiginnaartakkagut unammilerpagut
Assammik arsarluni nunanut allanut unammisartoq Christina V. Lange nunanut allanut unammisartut Nykøbing Falster Håndboldimut unammilerpata peqataassaaq. Taanna saniatigut isikkamik arsaalluni GM-imi aamma unammeqattaaqataavoq
Arnat nunanut allanut unammisartut Nykøbing Falster Håndboldimut ullumi sisamanngornermi Inussivimmi unammissapput.
Nunanut allanut unammisartoq, 28-nik ukiulik Christina V. Lange, unammeqataassaaq.
- Unamminissarput pissanganarpoq, tassami unammisassagut unammigaangata TV-ikkut isiginnaartagaraagut. Unamminissaannut qilanaartorujussuuvugut, unammisussanngorlugit nuanneqaaq, Sermitsiaq.AG-mut oqarpoq.
Naapeqqaarnissaannut pissangasimasoq
Unammisussat ippassaq pingasunngornermi sungiusaqatigiipput.
- Sungiusaqatigillugit pissarsiaqarnaqaaq, aamma sumi inissisimanerput takusinnaallugu paasisaqarnarpoq. Pissarsiaqartorujussuunissarput naatsorsuutigaara, kisianni soorunami naapeqqaarnissaannut pissangasorujussuugaluarpunga, kisianni massakkut ingasanngilaq. Unamminissatsinnut maannakkut qilanaarneruvunga, oqaluttuarpoq.
Assammik arsarnerinnaanngitsoq
Assammik arsarluni ulluni kingullerni sungiusartoqanngilaq. Tassami nunanut allanut unammisartut aqqanillit isikkamik arsaalluni nunatsinni pissartanngorniuteqataapput, unammisaqattaarnerit Nuummi ingerlanneqarlutik. Christina V. Lange NÛK-mi arsaateqataavoq, taakku tallimanngorpat GSS-imut pissartanngorniutivittussaapput. Arsaannermi Christina V. Lange illersuisuullunilu unammiffiup sinaani inissisimasarpoq.
- Qasunalaarpoq, nissukka maannakkut malunnalaarput. Kisianni timersoqattaarluni nuanneqaaq, Christina V. Lange oqarpoq.
Unamminissaq qilanaarnartoq
Arsaalluni pissartanngorniunnermi ullumi sisamanngornermi unammisoqassanngilaq. NÛK aamma GSS ippassaq unammimmata GSS 3-1-mik ajugaavoq - assammik arsartartut sungiusareernerisa kingorna unammillutik.
- Nykøbing Falster Håndbold-imut unamminermi tamaviaassaagut, unamminerput nuannissasoq naatsorsuutigaara, Christina V. Lange oqarpoq.
Kalaallit nunanut allanut unammisartui aamma Nykøbing Falster Håndboldip unamminerat aallartissaaq nalunaaqutaq 19.00. Inussivimmi sapaatiuppat unammeqqissapput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...