Nunanut allanut tunngasunut ministeri: Russit timmisartui malersuutit Kalaallit Nunaannut piffissap sivikitsup ingerlanerani apuussinnaassapput
Rusland Kalaallit Nunaannit 1.000 kilomiiterisut ungasissuseqaannartumi timmisartunik malersuutinik inissiilersaarpoq.
Russit timmisartuit malersuutit Kalaallit Nunaata ungasinngisaani inissinneqarnialersaarput. Sakkutooqarfimmi Nagurskoyemi Kalaallit Nunaanniit 1.000 kilomiiterisut ungasitsigisumiittumi russit illersornissaqarfiat timmisartunik malersuutinik timmisartunillu orsersuutinik inissiiniarluni pilersaarusiorpoq. Aaja Chemnitz Larsenip (IA) apeqquteqaataanut nunanut allanut tunngasunut ministerip Anders Samuelsen (LA) taama akissuteqarpoq.
Russit Issittumi sakkussiornerat maannamut illersoriarnissamut tunnganeruvoq, taannaannaanngilarli.
- Illersornissaqarfiup Isertortumik Paasiniaasartuisa paasisaat naapertorlugit ilimanaateqarluarpoq Ruslandip issittumi sakkussiornini sakkutuullu atortuinik amerlanerusunik inissiinissaa ingerlaannassasoq. Russit ingerlaasaat illersornermut tunnganeruvoq, saassussisinnaanermulli atortussiat annertunerujartuinnarlutik, Anders Samuelsen akissummini allappoq.
Pituffik angusinnaavaat
Nagurskoyemi timmisartunik malersuutinik inissiineq saassussinissamik siunertaqartumik inissiineruvoq.
- Sakkutooqarfik Qalasersuaq Avannarlermit Kalaallit Nunaanniillu 1.000 kilomiiterisut ungasissuseqartumiippoq, taamaattumillu sakkutooqarfinni tamani Kunngeqarfimmut qaninnerpaalluni, akissummi allassimavoq.
Timmisartullu malersuisut eqqarsaatigalugit Kalaallit Nunaata sineriaanut isorartussuseq naatsunnguuvoq.
- Sakkutooqarfimmiit timmisartut malersuutit Kalaallit Nunaata kangianut piffissaq sivikitsuinnaq atorlugu tikissinnaapput.
- Timmisartumit orsersuummit silaannarmi orserneqarlutik timmisartut malersuutit Pituffimmut apuussinnaapput.
Russit sakkussiornerata kingunerisinnaavaa Issittumi tamarmi sakkussiortoqalernissaa.
- Illersornissaqarfiup Isertortumik Paasiniaasartuisa 2018-imi ulorianartorsiornerup qaffasissusaanik nalilersuinerata takutippaa, russit Issittumi sakkussiornerisa kinguneranik issittumi sinerissami naalagaaffiit allat aamma sakkussiulersut.
Russit sakkussiornerat NATO-p maluginiarpaa
Anders Samuelsenip (LA) aalajangiusimajuarpaa Issittumi sakkussiortoqannginnissaq; nassuerutigaluguli Danmark NATO-lu russit sakkussiornerannut qisuariaateqarnialersaartut.
- Russit issittumi sakkussiornerat danskit naalakkersuisuisa malinnaavigeqqissaarpaat, taamatullu Danmarkip iligisai suleqataalu peqatigalugit nalilersuineq ingerlanneqarluni. Kalaallit Nunaat, Kunngeqarfiup sinnera ilanngullugu, Atlantikup Avannarpasissuani Isumaqatigiilluni Aalajangersakkamut (NATO) qularnaveeqqummut pisussaaffeqarnermullu peqataatinneqarpoq. Tamatumunnga peqatigitillugu danskit naalakkersuisuisa sumiiffimmi sakkussiunnginnissaq suli attappaat. Ilulissani 2008-imi nalunaarummi anguniakkanik aalajangersakkanillu Rusland malinnissalluni aamma pisussaaffeqarpoq.
- Issittumi ineriartorneq pillugu danskit naalakkersuisuisa Naalakkersuisut attaveqarfigisarpaat, ilaatigut sillimaniarnissamut politikkimut tunngatillugu, nunanut allanut tunngasunut ministeri akissummini naggasiivoq.