Nunanut allanut ministerip ataatsimoortumik tapiissutisiinnartarnissamik eqqarsaateqarneq akerlilerpaa
Kalaallit Nunaata namminersulivinnissaa pillugu Danmarkimik isumaqatiginninniarnermi qanoq angusaqartoqassanersoq kialluunniit eqqoriarsinnaanngilaa. Kalaallilli Nunaat ataatsimoortumik tapiissutinik suli pissarsisinnaanermut naalagaaffiup innuttaasunut pisussaaffii naapertorlugit pisinnaatitaaffeqarpoq, Danmarkimi inatsisinik atuutsitsinermut ministeri Namminersorneq pillugu inatsimmut innersuussisoq taamatut oqarpoq.
Takuuk: Jeppe Kofod inatsisinik atuutsitsinermut ministeritut allassimagaluarpoq. Nunanut allanut ministeriuvoq.
Nunanut allanut ministeri Jeppe Kofod (S) folketingimi ilaasortamt Aaja Chemnitz Larsenimut (IA) akissuteqarluni taamatut oqarpoq.
Folketingimi ilaasortap apeqqutigisimavaa, Kalaallit Nunaat assersuutigalugu free association malillugu nunarput Danmarkimit avissaaraluarpalluunniit ataatsimoortumik tapiissutitut ittunik Danmarkip aningaasatigut tapiissuteqaannartarnissaa inatsisitigut pisussaaffittut aamma/imaluunniit ileqqorissaarnissaq malillugu pisussaaffittut ministerip isigineraal.
Nunanut allanut naalakkersuisuusimasup Pele Brobergip (N) ilaatigut oqaaseqarsimanerata malitsigisaanik tamanna ullumikkut oqallisaavoq. Pele Brobergip oqaatiginikuuaa, naalagaaffiup innuttaasunut pisussaaffii naapertorlugit Danmarki Kalaallit Nunaannut aningaasatigut tapiissuteqaannarnissamut pisussaaffeqartoq.
Danmarkimi nunanut allanut ministerip allarniutigalugu erseqqissaassutigaa, Kalaallit Nunaata namminersulivinnissaa pillugu isumaqatiginninniarnerit qanoq inerneqarumaarnersut siumoorluni oqaatigineqarsinnaanngitsoq.
Allagaatinik misissuisimasoq
Inatsisinik atuutsitsinermut ministeri allagaatinik misissuisimavoq, Danmarkillu ataatsimoortunik tapiissuteqartarnermut tunngatillugu naalagaaffiup innuttaasunut pisussaaffii eqqarsaatigalugit pisussaaffeqarneranut tunngavilersuutaasinnaasunik nassaarsimanani.
Jeppe Kofodip Aaja Chemnitz Larsenimut (IA) akissuteqarnermini innersuussutigaa, aningaasatigut tapiissuteqaannartoqartassanersoq Namminersornermut inatsisip suliarineqarnerani ilanngullugu suliarineqarsimasoq, tassa Nunanut allanut Ministeeriaqarfip 2005-imi allakkiaani tamanna takuneqarsinnaasoq.
Kalaallit Nunaanni innuttaasut namminersulivinnissaq aalajangissappassuk, naalagaaffiup innuttaasunut pisussaaffii naapertorlugit pisinnaatitaaffiit pisussaaffiillu sorliit Kalaallit Nunaata Danmarkillu akornanni atuutissanersut allakkiami isummerfigineqarsimapput:
- Naalagaaffiup innuttaasunut pisussaaffii naapertorlugit, namminersulivittoqassappat aningaasatigut tapiissutisisarnissamut - ataatsimoortunilluunniit tapiissutisisarnissamut - tassa tamakkiisumik ilaannakortunilluunniit (imaluunniit najoqqutassiaq immikkut ittoq malillugu tapiissutigineqartartut appartikkiartuaarneqassanersut) piumasaqaateqanngilaq. Tamanna aamma atuuppoq, tapiissutigineqartartut pineqartup aningaasatigut toqqammaviisa annersarigaluarpagilluunniit.
- Ataatsimoortumik tapiissutit attatiinnarneqassanersut annikilliartortinneqassanersulluunniit pillugit immikkut ittumik aaqqissuussisoqarnissaanik isumaqatigiissuteqartoqanngippat, Kalaallit Nunaata namminersulivinnissamut isumaqatigiissutaa atuutsinneqalerpat, naalagaaffiup innuttaasunut pisussaaffii malillugit taamatut tapiiffigineqartarnissamut piumasaqaateqanngilaq, inatsisinik atuutsitsinermut ministeeriaqarfiup allakkiaani allassimavoq.
Nunanut allanut ministerip akissuteqarami aamma oqaatigaa, Kalaallit Nunaa free-associationimik taaneqartartoq aqqutigalugu Danmarkimut atassuteqaannaraluarpalluunniit allatut aaqqiisoqarnissaa ilimananngitsoq:
- Pineqartoq pillugu isumaqatiginninniarnermi illuatungeriit kiffaanngissuseqarput, naalagaaffiullu innuttaasunut pisussaaffii naapertorlugit siunissami suleqatigiinnissamut piumasaqaateqanngilaq. Kiffaanngissuseqarluni kattuteqatigiinnissamik apeqqut pineqartillugu, naalagaaffiup innuttaasunut pisussaaffiinut atatillugu inerniliunneqarsimavoq: ”Naalagaaffiup innuttaasunut pisussaaffini, Kalaallit Nunaat kiffaanngissuseqarluni Danmarkimut ataannarnissamut pisinnaatitaaffeqanngitsoq”.