'Nunatsinnut iluaqutissat'

Nunanut allanut ministerip assani isaappaa

Peqatigiilluta Kalaallit Nunaanni inuiaqatigiit ineriartornerat misissoqqissaartariaqarparput, taama Martin Lidegaard marlunngormat Kalaallit Nunaat pillugu isumasioqatigiinnermi oqarpoq

Nunanut allanut naalakkersuisut Martin Lidegaard Namminersorlutik Oqartussat qaninnerusumik suleqatigerusuppaa Kalaallit Nunaata pisussutaasa umaatsut pillugit iliuuserineqartussat pillugit

Kalaallit Nunaanni pisussuutit uumaatsut pillugit oqallinnitsinnut aammalumi Kalaallit Nunaata namminersulivinnissaa anguniarnerani sakkussaqarpugut, namminersorneq pillugu isumaqatigiissut, naalagaaffeqatigiit Issittoq pillugu iliuusissatut isumaqatigiissutaat aamma maanna nalunaarusiaq 'Kalaallit Nunaannuut iluaqutissaaqqullugu'.

Danmarkip Kalaallit nunaatalu peqatigiillutik misissortaqariaqarpaat suna Kalaallit Nunaanni najugaqartunut tamanut pitsaanerpaajunersoq, taama oqarpoq nunanut allanut naalakkersuisunngorlaaq Martin Lidegaard, Det Radikale Venstremeersoq Kalaallit Nunaat pillugu Københavnip Universitetiani isumasioqatigiittuni, ilaatigut professor Minik Rosingip nalunaarusiamik 'Kalaallit Nunaannut iluaqutissaaqqullugu' saqquummiiffigisaani.

- Assakka Kalaallit Nunaanni Namminersorlutik Oqartussanut ullumi isaakkusuppakka oqarlungalu: allannguutissat suleqatigiissutissallu namminersorneq pillugu isumaqatigissut ataqqillugu illuatungeriit tamarmik iluaqutaasussat maanna ujartortigit, Martin Lidegaard saaffiginnippoq.

- Suut iliuuserineqarsinnaappat maannakkumut suli aallartinneqanngitsut? Naalakkersuisoq Kalaallit Nunaanni Namminersorlutik Oqartussanut pisuussutit uumaatsut siunissarlu pillugi suli qaninnerusumik suleqatiginnikkusulluni nalunaarnermini.

Namminersorneq pillugu isumaqatigiissut namminersulivikkusunnerlu
Nunanut allanut naalakkersuisoq isumaqarpoq Kalaallit Nunaata pisuussutai uumaatsut pillugit oqallinneq annertusissasoq.

- Oqallinerup sinakkutai marluupput. Namminersorneq pillugu isumaqatigiissut, taannalu naalagaaffeqatigiit tamarmik iluarisimaarpaat tassanimi sinaakkusersorneqarmata maanna oqallissutissagut.

- Aappaatut tikkuarusuppara suleqatigiinnerput. Taannami nunarsuarmi suleqatigiit allat assiginagit immikkuullaarissuvoq. Illuatungaani tatigeqatigiilluinnarluta Kalaallit Nunaat Danmarkilu naalagaaffeqatigiinnissatsinnik isumaqatigiissimavugut, politikkikkut anguniakkatsinniimmallu illuatungeriinni nunasisut ammaffigilluinnarpavut. Illuatungaanilu nalunngilluinnarparput Kalaallit Nunaata kissaatigilluinnaraa annertunerusumik namminiilerusunneq aammalumi piffissanngorpat namminersulivinnissaq. Tamanna Danmarkip ataqqivaa, paasillugu akueralugulu, nunanut allanut naalakkersuisoq taama nunanut allanut naalakkersuisutut oqalugiarngaarnermini oqarpoq.

Martin Lidegaardip naqissuserpaattaaq aningaasaliisussat nunanit allaneersussat ujartorneqarmata oqatigaalu inuussutissarsiutit- aamma aningaasarsiornikkut siuariartornissaq pillugu naalakkersuisoqarfimmi maanna ujartorneqalereermata. Kisianniligooq aningaasaliissussanik nassaarneq naaminermi naammanngilaq, pisoqartariaqarpormigooq.

- Kisianni piiaaffiinnik ima amerlatigisunik, aningaasaliisussanik ima amerlatigisunik imalu ukiuni amerlatigisuni oqariatuutip ersersippaa tamatta suliassarpassuaqartugut naalagaaffeqatigiinni. Qanoq ililluta aningaasaliisussat nassaariinnarnagit aammali pisoqarnissaa isumakkiissavarput, Lidegaard aperaaq.

- Qanoq iliillutaana Kalaallit Nunaanni pisuussutit piaannarnagit nunap innuttaanut iluaqutaalernissaat isumagisinnaavarput. Suli iliuusissagut suuppat, nunanut allanut naalakkersuisoq Namminersorlutik Oqartussanut saaffiginnissummini aperaaq.

Nalunaarusiap ”Kalaallit Nunaannut iluatissaaqqullugu”p tikkuarpaa inuiaqatigiit siunissami ilusissaat Kalaallit Nunaanni najugallit tamavimmik oqallisigisariaqaraat.

Powered by Labrador CMS