Nunanut allanut ministeri Nuummut tikeraalersoq
Nunanut allanut tunngasunut ministeri Jeppe Kofod Nuummut ataasinngornermi tikissaaq, Nuummiinnerminilu ilaatigut Nunanut allanut tunngasunut Naalakkersuisoq Ane Lone Bagger ataatsimeeqatigissavaa.
Nunanut allanut tunngasunut ministeeriaqarfik Sermitsiaq.AG-mut ilisimatitsivoq, Jeppe Kofod Nuummukassasoq. Nunanut allanut tunngasunut ministerip danskillu naalakkersuisuisa kissaatigaat Naalakkersuisunut, Kalaallit Nunaannut kiisalu naalagaaffeqatigiinnermi tamarmi suleqatigiinneq nukittorsarneqarlunilu annertusarneqassasoq.
Suliffeqarfinnut pulaarneq
Tikeraarnermi pilersaarut suli saqqummiunneqanngilaq, Nunanut allanut tunngasunut Naalakkersuisup Ane Lone Baggerip ataatsimeeqatigineratali saniatigut, nunatsinni illoqarfiit pingaarnersaanni suliffeqarfinnut assigiinngitsunut Jeppe Kofod pulaassalluni pilersaaruteqareerpoq.
Jeppe Kofod pilersaarutit malillugit pingasunngornermi Danmarkiliaqqissaaq.
Tikeraarnissami pilersaarutit Nunanut allanut tunngasunut ministeeriaqarfiup ataasinngornermi ullaakkut saqqummiutissavai.