Nunanut allanut ataatsimiititaliaq Nuummi: Siulittaasoq akuutitsinerunissamik neriuuteqartoq
Inatsisartunut ilaasortat Naalagaaffeqatigiinni nunanit pingasunit tamaneersut nunanut allanut ataatsimiititaliameersut juunip 7-ani 8-anilu naapeqatigiippata Nuummi nutaamik pisoqassaaq.
Nunanut allanut Sillimaniarnermullu Ataatsimiititaliap siulittaasuata Mariia Simonsenip (IA) naalagaaffiup immikkoortuisa sinneranit inatsisartunut ilaasortat Nuummi naapeqatiginissaat qilanaaraa.
Tamanna juunip 7-ani 8-anilu pissaaq, tassanilu nunanut allanut ataatsimiititaliaq siullermeerluni Naalagaaffeqatigiit akimorlugit ataatsimeeqatigiissalluni.
Mariia Simonsen Sermitsiaq.AG-mut oqarpoq, tamanna ataatsimoorussamik ataatsimeeqatigiinnerit siullersarissagaat, tamatumalu kingorna isummerfigineqassasoq oqalliffik ataatsimiititaliamit siunissami peqataaffigineqartalissanersoq. Taanna Danmarkimi, Savalimmiuni Kalaallit Nunaannilu nunanut allanut ataatsimiititaliamit pisortatigoortumik suleqatigiiffigaat.
Politikeri Sermitsiaq.AG-mut oqaluttuarpoq, ataatsimiititaliaq sammisanik Kalaallit Nunaanni Issittumilu nunanut allanut sillimaniarnermilu politikkimut tunngasunik qallikkuinnaq sammisaqartarneq akuttunngitsumik misigisaqartartoq.
Folketingimut ilaasortat ilisimasatinneqarnerusartut
- Naalakkersuisorput paasissutissinneqartariaqarnitsinnik isumaqaleraangat ataatsimiititaliami taamaallaat ilisimasaqalersarpugut. Tamanna eqqarsaatigalugu piginnaatitaaffeqaratalu pisinnaatitaaffeqanngilagut, Mariia Simonsen oqarpoq.
Folketingimi Nunanut Allanut Ataatsimiititaq, Udenrigspolitisk Nævn, eqqarsaatigalugu, pissutsit allaanerulluinnartut pineqarput, taanna tunngaviusumik inatsisini qulakkiikkamik ataatsimiititaammat, Danmarkimi naalakkersuisunit nunanut allanut politikkimi suliani pingaarutilinni siunersiuiffigissallugu pisussaaffigineqartoq.
- Suleriaaseq tamanna isumaqarpoq kalaallit Folketingimut ilaasortat Inatsisartunut ilaasortanit ilisimatinneqarnerusarnerannik, Mariia Simonsen oqarpoq, nunanullu allanut ataatsimiititaliap ataatsimeeqatiginissaanut qilanaarnerarluni.
Ministerinik isertortumillu paasiniaasartoqarfinnik aamma ataatsimeeqateqassasut
Nuummi ataatsimiinneq pissaaq Danmarkimi, Kalaallit Nunaanni Savalimmiunilu naalakkersuisut siuttuisa akornanni ataatsimeeqatigiinneq nalinginnaasoq nalerorlugu. Tamatuma saniatigut nunat taakkua pingasut akornanni attaveqatigiinnermut ataatsimiititaliaq naalagaaffeqatigiinni siuttut ataatsimeeqatigiinnerat sioqqutitsiarlugu juunip 6-ani aamma ataatsimeeqatigiissaaq. Attaveqatigiinnermut ataatsimiititaliaq apeqqutinik nunanut allanut sillimaniarnermullu tunngasunik suliaqartarpoq.
Ataatsimiinnerilli taakkua marluk imminnut attuumassuteqanngitsut, Mariia Simonsen nassuiaavoq.
Ataatsimiinnerilli ataatsikkut ingerlanneqarnerat pitsaaqutigaat, inatsisartunut ilaasortat nunanut allanut ministerimik Lars Løkke Rasmussenimik aamma illersornissamut ministerimik Troels Lund Poulsenimik ataatsimeeqateqarsinnaammata.
Tamatuma saniatigut politikerit Politiit Illersornissaqarfiullu isertortumik paasiniaasartoqarfiinit ilisimatitsissutinik tunineqassapput.
Ataatsimiititaliamut piginnaatitsissutit pillugu suliaqarneq ingerlasoq
Nunanut allanut Sillimaniarnermullu Ataatsimiititaliaq pillugu oqallinneq nutaajunngilaq. 2021-mi taamani USPU-mut siulittaasoq Sofia Geisler (IA) siunnersuuteqarpoq, inatsisit allannguutissaannik suliaqartoqartariaqartoq, ataatsimiititaliaq Danmarkimi nunanut allanut ataatsimiititami pisinnaatitaaffinnik piginnaatitaaffinnillu assingusunik peqalersinnaaqqullugu.
Pineqartumi allannguutinik pisoqarsimanngilaq, kisianni nunanut allanut sillimaniarnermullu ataatsimiititaliamut piginnaatitsissutit annertusarniarlugit suliaq ingerlanneqarpoq. Tamatumani Inatsisartut suleriaasiannik allanngortitsinissaq pisariaqarpoq, suliarlu Mariia Simonsen naapertorlugu maannakkorpiaq nunanut allanut naalakkersuisoqarfimmiippoq.