Nunanit tamalaanit filmiliortut Ineqip tapiiffiniarpai

Nunanit tamalaanit filmiliortut taperserneqartalernissaat, Ineqi Kielsenip Siumumeersup siunnersuutigaa.

- Takornariaqarnermut tunngatillugu saqqumilaarnissamut pisariitsoq tassaavoq, nunanit tamalaanit filmiliortut Kalaalit Nunaannut pilerisaarlugit tikisinneqarsinnaanerat. Kalaallit Nunaata taakku immiussinerit qulakkeerniarlugit nunat allat unammillerterai. Nunat unammillertaasut assigiinngitsunik tapiissuteqartarput, tamatumalu kinguneranik nunanit tamalaaneersut filmiliaat nunatsinnit assitaqartinneqartut assersuutigalugu Islandimi ullumikkut immiunneqartarput, taanna taama nalunaaruteqarpoq.

Aaqqiissut utertitsisinnaanermut aaqqiissutitut pilersinneqarnissaa taassuma siunnersuutigaa, taamaalilluni assersuutigalugu filmiliornermut ingerlatseqatigiiffiup ilaatigut unnuinermut, angalanermut nerisaqarnermullu aningaasartuutimi pingajorarterutaat utertissinnaallugit.

- Filmiliortut Kalaallit Nunaanni immiussigaangamik suliffeqarfitsinnut kaaviaartitsisarput, Ineqi Kielsen (S) oqarpoq.

- Kaaviaartitat amerlinerisigut suliffinnik amerlanerusunik pilersitsisarput akileraarutitigullu isertitat amerlisarlutik.

- Pisortanit pisartakkat, akileraarutitigut isertitat, akitsuutit il.il. naatsorsuutinut ilanngukkaanni, siunnersuut aningaasartuutitaqarnavianngilaq.