Nunanit tamalaaneersut annaassiniartarnermik Nuummi sungiusassasut
Sapaatip akunnerata tulliani Franskit Amerikamiullu sakkutuuisa umiarsuaannik peqataasoqartumik Nuup imartaani sungiusartoqassaaq.
Issittumi Sakkutooqarfik sapaatip akunnera tulliuttoq tamaat – ataasinngorneq juunip 21-aniit tallimanngorneq juunip 25-at ilanngullugu - Nuup eqqaani sungiusartitsissaaq. Sungiusarnermi ujaasisarneq, annaassiniartarneq imaanilu avatangiisit sammineqassapput.
Issittumi Sakkutooqarfik Facebookikkut ilisimatitsivoq.
Issittumi Sakkutooqarfiup umiarsuaatini alapernaarsuut Ejnar Mikkelsen timmisartuunilu Challenger sungiusarnermut peqataatinniarpai.
Taakkua saniatigut Kalaallit Nunaanni Politiit, Kalaallit Nunaanni Upalungaarsimasut, Air Greenlandip qulimiguuliutaa annaassiniartartoq kiisalu Franskit sakkutuuisa umiarsuaat Fulmar aamma Amerikamiut umiarsuaat Maple, Amerikamiut sineriammi nakkutilliisartuat sungiusaqataassapput.
Ajunaarnersuaqarnerani ikiuunnermi suleqatigiinnissamut piareersimasut
Umiarsuit nunanit allaneersut taakku marluk sapaatiuppat Nuummut tikissapput:
- Sakkutuut umiarsuaat Nuup eqqaaniinneq ajortut imaluunniit imaatigut silaannakkullu qaqutigoortumik suliaqartoqarnera maluginiarsimassagukku, sungiusartoqarnera pissutaavoq, Issittumi Sakkutooqarfik aallappoq.
Issittumi Sakkutooqarfik Sermitsiaq.AG-mut allakkatigut akissuteqarluni ilisimatitsivoq, nunanit tamalaaneersut sungiusarnerat nunat tamalaat Issittumi suleqatigiittarnerisa annertusarneqarsinnaanerannut periarfissaasoq:
- Ajunaarnersuaqarnerani suleqagtigiinnissamut piareersimasarniarluta (soorlu imaatigut ajunaarnersuaqarnerani imaluunniit umiarsuit takornariartitsisartut ajornartorsiorneranni). Nunat allat misilittagaat assigiinngitsut iluaqutigisinnaasavut ilinniarfigisinnaavagut. Tassunga ilanngullugu oqaatigineqassaaq, imaani avatangiisinut tunngatillugit ilisimasallit arlallit sungiusarnermut peqataassammata, Issittumi Sakkutooqarfik allappoq.
Coronamut atatillugu malittarisassat tamarmik malinneqassasut
Siorna sungiusartoqarnerani misilittagarilerneqartut ilagaat oqaatsit assigiinngitsuunerat:
- Sungiusartut akornanni oqaloqatigiittarnerup naatsorsuutigisamit ajornarnerunera ilikkarsimavarput, tamarmimmi assigiimmik oqaaseqangillat, tassa danskisut, tuluttut kalaallisullu oqaaseqartuugamik, Issittumi Sakkutooqarfik allappoq.
Issittumi Sakkutooqarfiup ilanngullugu erseqqissaassutigaa, Kalaallit Nunaanni coronap atuunnera eqqarsaatigalugu sungiusarnissaq aaqqissuunneqarsimasoq, aamma malitarisassat tamarmik maleqqissaarneqarnissaat qulakkeerneqarsimasoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...