Nunanit allanit sulisullit: Maleruagassat malippagut
Nuummut suliartortut tikeqqaarnermi mattusimaqqaartarnissaat qularnaarneqartartut suliffeqarfiit sanaartornermik ingerlatsisut oqaatigaat. Tamanna Sermitsiaq.AG-ip suliffeqarfinnut assigiinngitsunut paasiniaanermini paasinarsivoq.
Danmarkimit tikinnermit ulluni 14-ini mattusimasarnissamut imaluunniit tikinnermit ullut tallimat qaangiunnerani misissorteqqittarnissamut piumasaqaatit atuutileqqipput septembarip 30-ani. Suliffeqarfiit sanaartornermik ingerlatsisut nunanit allanit sulisoqartarneq atugarineqartoq ilisimaneqareerpoq.
Suliffeqarfiit nunanit allanit sulisullit sulisut tikikkaangata qanoq iliuuseqartarnersut Sermitsiaq.AG-imit aperineqarput.
Corona pillugu allatseqarfik Sermitsiaq.AG-imut ilisimatitsivoq, tikereernermi mattusimanissaq pillugu immikkut akuersissummik tunisisoqarneq ajortoq. Immikkulluni akuersissummik tunisisoqarsinnaasarpoq, tikerlaat ingerlannaaq suliartorsinnaanerannut atatillugu, tamanna pisinnaavoq aatsaat sulisoq suleqatiminit akulerusimanngilluinnarnissaa qulakkeerneqarsinnaappat. Taamatut isumaqatigiissuteqartoqassappat corona pillugu allatseqarfik akuerseqqaartussaavoq.
Nuna tamakkerlugu nakorsaqarfimmit innersuussutit tamarmik malinneqartartut EMJ Atcon-imit Bo Eriksen oqarpoq.
- Paasissutissiisarnerput pitsaanerulersinnikuuarput, tassa sulisut tamaasa nalunaarfigineqartarput aamma eqqarsarluarnissaat qinnuigisarpagut. Sulisut aamma maleruagassanik malinninnissanik akisussaaffeqarput, politiiusaarfigisinnaanngilagummi qanoq iliuuseqarnissaat pillugu. Angalanissaannut uppernarsaatissaat pisiaritinnagit suut inatsisaanersut sulisutsinnut paasissutissiisarpugut, oqarpoq.
Suleriuseq
Sulisut Danmarkimit tikittussat pillugit suleriaaseq ataavartuusoq Permagreenip HR-imut pisortaa Vivian Mørch Simonsen oqarpoq.
- Allat assigalugit sulisut tikeqqammersut maleruagassat malittarpaat. Tikeqqammerneranni mattusimagallartussaasut allaffigisarpagut. Ullut tallimassaanni misissorteqqissasut aamma oqarfigisarpagut, misissortikkiartornerannut aamma ikiuuttarpugut. Najugaqarfianni mattusimanissaat qularnaartarparput, Vivian Mørch Simonsen oqaluttuarpoq.
Sulisut Danmarkimit tikittut tamaasa maleruagassat tamaasa malittaraat naqissuserpaa.
Ajornartorsiuteqarsimanngitsut
Maleruagassat pillugit ajornartorsiuteqanngisaannarsimallutik MT Højgaardip Nuummi immikkoortortaqarfiani pisortaq Kim Ulrik Hansen oqarpoq.
- Atorfillit ilaat angerlarsimallutik sulisinnaasarput, maannakkorpiarlu tikeqqammertoq ataaseq angerlarsimalluni sulivoq. Elevatorimik suliaqariartortumik sapaatip akunnerata suliani tikisitsivugut, aamma taanna ulluni tallimani mattusimaqqaarpoq. Mattusimareermat misissorneqarpoq, napparsimanngimmallu suliartorlunilu, oqaluttuarpoq.
Oqartussat maleruaqqusaasa tamaasa malinneqarnissaat suliffeqarfik sulisoq Kim Ulrik Hansen oqarpoq.
- Suliartortut tikereeraangata, mattusimareeraangatalu, ullut tallimassaanni misissorneqaqqittarput. Ulluni 14-ni mattusimanissaat uagutsinnit kissaataanngilaq, taamaattumik ulluni tallimani Nunatsinneereeraangata misissortittarnissaat kissaatigisarparput, sulineq sukkanerusumik ingerlanneqarnissaa anguniartaratsigu.
Inatsisit maleruagassallu
Siorarsiorfik - Nuuk City Development Nuummi assigiinngitsunik sanaartortitsisuupput, sanaartortitsinissamut suliaqartut ilaat Danmarkimit tikittuusarput.
- Suliffeqarfiit namminneerlutik sulisussaminnik ujaasisarput, Nunatsinninngaanneersuusinnaallutilluunniit nunanit allaninngaanneersuusarput. Soorunami suliffeqarfinnut ikiuisarpugut, maannakkummi maleruagassat inatsisillu allanngorarnikuupput. Immikkut ittunik isumaqatigiissusiortoqarusuppat suliffeqarfiit sumut saaffiginnissanersut innersuussisarpugut, pisortaq Jens B. Frederiksen oqarpoq.
Maleruagassat malinneqannginnerinik ernumasoqarpat pasitsaassisoqarpalluunniit corona pillugu allatseqarfimmut imaluunniit politiinut saaffiginnittoqarsinnaasoq, allatseqarfimmi pisortaq Nels Ulrik Vinther oqarpoq.