Nunanit allanit suliartortut pillugit suliaq kinguartiterneqartoq: Pilertortumik sulisunik tikisitsisinnaanermik aaqqissuussineq Kielsenip aamma Svanep unitsippaat
Sanaartornermi suliaqarfiit piffissami sivisuumik nilliaatigaat sulisunik pilertortumik tikisitsisinnaanermik aaqqissuussineq, nunarsuarmit tamaneersunik pilertortumik sulisussarsiorsinnaanermik Kalaallit Nunaannik ammaassisussaq. Siumukkut kingullermik aqutsisuusut Danmarkimik isumaqatigiissuteqarnissaq kinguarsarsimavaat tamatuminnga suliaq unitsikkallarlugu. IA-Naleraq-aqutsisut Danmarkimit isumaqatigiissuteqarnissaq isummerfigisussanngorpaat.
EU-mi nunat nunarsuarmit tamaneersunik sulisussanik kajungilersitsinissamik unammisut Kalaallit Nunaat suli nangaavoq taamaalillunilu inuussutissarsiornermi avataaneersunik sulisussanik pikkorissunik sulisussarsinissamut kingullinngorluni, Sermitsiaq allappoq.
Siumumik kingullermik naalakkersuisooqatigiit ukioq ataaseq sinnerlugu pilertortumik sulisunik tikisitsisinnaanermik Københavnimi regeringimik pingaaruteqartumik annertuumillu isumaqatigiissuteqarnissaq kinguarsarsimavaat. Tamatuma utaqqinera Danmarkimit qatsunneqarpoq.
Taamatut isumaqarpoq inuussutissarsiornermik ingerlatsiviit kattuffiisa annerpaartaanni GE-mi pingaarutilimmik inissisimasoq.
– Uanga paasisara naapertorlugu pilertortumik sulisunik tikisitsisinnaanermik aaqqissuussineq siullermik atuutilersinniarneqarsimagaluarpoq, taavalu taamaaliorusukkunnaarsimallutik. Danmarkimit erseqqissumik paasineqarusuppoq Kalaallit Nunaata suna kissaatigineraa. Tamatuma kinguneranik Danmarkimit suliaq unitsikkallarneqarpoq namminersorlutik oqartussanit erseqqissumik Kalaallit Nunaat suniarnersoq aamma sumik kissaateqarnersoq pillugit akissuteqartoqarnissaata tungaanut, Kalaallit Nunaanni Sulisitsisuni allatseqarfimmi pisortaq Karsten Lyberth-Klausen oqarpoq.
Isumaqatigiissuteqartoqarsinnaasoq
IA-Neleraq-Naalakkersuisunngortussat isumaqatigiissummut akuersippata kiisami, udlændinge- og integrationsminister Mattias Tesfayep, sulisunik pilertortumik tikisitsisinnaanermik aaqqissuussineq Kalaallit Nunaanni atuutilersissinnaavaa.
Inuussutissarsiornermi ingerlatsisut pingaaruteqartut ilaatigut suliffeqarfiit sanaartornermik suliaqartut taamaalillutik sulisussanik nunanit allaneersunik Kalaallit Nunaannut tikisitsisinnaanerat pilertornerulersinnaavoq.
– Regeringimit paasissutissanik nutaanik tunineqaqqammerpunga. Akissutissaq naatsoq tassaavoq ministerimut missingiut piareersimatinneqarsimammat Inatsisartunut qinersinissamik nalunaaruteqartoqarmat. Naalakkersuisunngortussap nutaap Pele Brobergip missingiut misissussavaa tulleriiaarinerit saqqummiunneqartut tunngavigalugit. Kalaallit Nunaata aamma Danmarkip suliaq pillugu isumaqatigiinniareerpata, taava ministerip isumaqatigiissut atsiorsinnaassavaa, taamak Sermitsiamut IA-p Folketingimi ilaasortaatitaa Aaja Chemnitz Larsen oqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: