Nunani tamalaani aatsitassarsiortitseqatigiiffik Nunatsinni ujaasisoq
Anglo American Exploration Kitaani misissueqqissaarnissamut akuersissuteqarfigineqarpoq. Ingerlatseqatigiiffik nunarsuarmi annerpaanut ilaasoq, nikkelimik kanngussammillu ataavartumik nukissiornermi teknologinilu mingutsitsinngitsunut ikaarsaarnermi saffiugassanik pingaarutilinnik ujaassissaaq.
Tuluit ingerlatseqatigiiffiat Anglo American Exploration Overseas Holdings Limited (Anglo American) aammaarluni Nunatsinni saffiugassanik ujaasinissamut akuersissummik pigisaqalerpoq.
Ingerlatseqatigiiffik Kitaani misissueqqissaarnissamut marlunnik pisinnaatitsissuteqalerpoq, Upernaviup kujataani. Taakku saniatigut ingerlatseqatigiiffik Kitaani sumiiffimmi nalinginnaasumi misissueqqaarnissamut akuersissummik tunineqarluni, aviisi Sermitsiaq allappoq.
Akuersissutit taakku tamarmik ukiuni tallimani atuuttussatut tunniunneqarput, tassa 2023-mi decembarip 31-annut atuutissallutik. Ujarlernerit nikkeleqarneranik, kanngussaqarneranik, saviminissartalinnillu platininik misissuinerussapput.
Uteqqittut
Anglo American, Sydafrikami aamma Tuluit Nunaanni ingerlatsiveqartoq, nunarsuarmi platinimik tunisassiortut annersaraat, nunarsuarmi tunineqartartut 40 procentiisa missaannik tunisassiortuulluni. Tamatuma peqatigisaanik ingerlatseqatigiiffiup annertuumik tunisassiarisarpai diamantit, kanngussak, nikkeli, saviminissaq aamma saffiugassartalinnik aamma aamarsuarnik kissassusilimmeersunik. Taamaalilluni pineqartoq tassaavoq Nunatsinni suliaqarsimasuni pisinnaatitaaffeqartut annersaat.
Ingerlatseqatigiiffik kingullermik 2012-imi Nunatsinniippoq, tamatumani ingerlatseqatigiiffik Avannaa Resources peqatigalugu annerusumik Tunumi kanngussammik ujaasisoqarluni. Taakkuli nassaassaqarpallaannginnera pissutigalugu ujaasinertik pilertortumik unitsippaat. Maannalu aperisoqarsinnaalluni sooq Nunatsinnut uternersut.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: