Nunani avannarlerni nunap inoqqaavi qitiutinneqartut

Nunanut allanut ministereqarfiup issittumi najugaqarluni unammilligassat nunanilu avannarlerni periarfissat pillugit nalunaarusiaata pitsaassutsimigut Danmarkimi, Savalimmiuni Kalaallit Nunaannilu najugaqartunut paasissutissiilluartoq Torbjørn Jacobsenip ilaatigut oqaatigaa.

- Nunat avannarliit inoqqaavi nalunaarusiami qitiutinneqarneri nuannaarutissaavoq, Torbjørn Jacobsen oqarpoq.

Naak nersualaaringaluarluni aamma isorinnippoq. Nalunaarusiap oktoberip 25-ni oqallisigineqarmat Danmarkip EU-p soqutigisaai salliutissimammagit Kalaallit Nunaatalu Savalimmiullu soqutigisai tunulliussimammagit taassuma isoraa.

- Naalakkersuisoqarfimmi maani pissutsinut malinnaaginnalersimavugut. Arlaannik suliassaqartillugu pitsaaneq ujartorneqartarsimavoq, Torbjørn Jacobsen oqarpoq.

Avaleraasartuut aporaaffiunerini Savalimmiut talittarfiat taliffingeqqujunnaarneranik Danmarkip EU tapersersorsimagaa assersuutigaa.

Piujuaannartitsinissaq

Nunani avannarlerni isumalluutaasinnaasut piujuaannartitsinermik pingaartitsinermik aallaveqassasut Torbjørn Jacobsenip nuannaarutigaa. Aalisarnermi periarfissat sikup aakkiartornerani amerliartorneri ilutigalugit nunani avannarlerni ingerlatsinermut 2015-mi isumaqatigiissusiortoqarpoq.

- Isumaqatigiissusiortoqarnermi USA Canadalu pingasoriarlutik ataatsimeeqatingeereerput. Ataatsimiinnerlu tulliuttoq Savalimmiuni ingerlanneqassaaq. Taanna USA, Rusland, Canada, Naalagaaffeqatigiit Kalaallit Nunaat Savalimmiullu, Norge, Island, Japan, Kina, Sydkorea EU-lu peqataaffigissallugu, Torbjørn Jacobsen oqarpoq.

Suleqatigiissitaq naammagineqanngilaq

Issittumi siunnersooqatigiinnut nunat allat ilaasortanngornissaminnut soqutiginnittut Sjúrður Skaale (J) EU pillgu oqaaqaatiminni taakkartorpaa.

Nunani avannarlerni najugaqanngitsut tamakkiisumik ilaasortaasinnaassanngitsut taanna isumaqarluni.

- Soqutiginnittut akuutinnissaat ajunngilluinnarpoq – sissuertariaqarpugulli. Nunaqarpormi issittumut soqutiginnittut najugaqarfinngortitserusuttunik. Allanngutsaaliisoqarluni misissuiffiginissaa siunertaralugu, Sjúrður Skaale oqarpoq.

EU nakkutilliisutut inissisimassaaq

Issittumi siunnersuisooqatigiinni EU nakkutilliisutut inissisimassasoq Kristian Jensen(V) isumaqarpoq.

- EU nunallumi allat soqutiginnillutik akuusinnaapput. Nunani avannarlerni atugassarititaasut ineriartortitsinissamullu periarfissat pillugit EU-mi ilisimasat qaffasinnerusut qularinngilara, Kristian Jensen oqarpoq.