ataatsimiittut

Nunani avannarlerni killerni peqqissutsimut naalakkersuisut ilisimasat misilitakkallu avitseqatigiissutigaat

Sapaatip-akunnerata siuliani nunani avannarlerni killerni peqqissutsimut naalakkersuisut ataatsimiinneranni, Peqqissutsimut Naalakkersuisoq, Agathe Fontain aggersaasuuvoq

Her ses de tre Vestnordisk sundhedsministre på pressemødet i sidste uge

Ataatsimeeqatigiinnermi anguniarneqartoq tassaavoq nunat akornanni ilisimasanik misilittakkanillu aviteqatgiinnissaq aammalu nunani pingasuusuni taakkunani peqqissutsimut naalakkersuisut suleqatigiinnerisa annertusarneqarnissaa.

- Islandimi Savalimmiunilu naalakkersuisutut suleqatima suleqatiginerat nuannareqaara. Naak nunarput, Islandi Savalimmiullu sorpassuartigut assigiinngissuseqaraluartut peqqissutsimut tunngasutigut unammilligassavut assigiipput. Taamaattumillu misilittakkatsinnik avitseqatigiilluarsinnaalluta, Agathe Fontain tusagassiuutinut nalunaarummi oqarpoq.

Aamm atuaruk: Nunani avannarlerni peqqissutsimut ministerit qanimut suleqatigiinnerat

Eqqarsarluartariaqarneq

Peqqissutsimut Naalakkersuisoq tikkuaavoq, inuiaqatigiit siammasissumik najugaqartuunerput, assigiinnillu unammilligassallit.

- Inuuvugut aammalu peqqissaanermik sulisunik pisariaqartitanik sulisussarsiorneq eqqarsaatigalugu unammilligassagut assigiillutik. Taamaattumillu innuttaasut peqqissutsip tungaatigut pitsaasumik sullisissagutsigit pilersitassat nutaat eqqarsaatigisariaqarpavut. Tamatumani misilittakkagut atorluarsinnaavavut, taamaalillutalu tamatigut nutaanik ujartuisariaqarnata.

Namminersorlutik Oqartussat pasissutissiipput, Nunatsinni peqqinnissaqarfiup aaqqissugaanera, tassungalu ilanngullugu peqqinnissaqarfiup nunap immikkoortuinut eqitigaanera aammalu nunap immikkoortuinut eqitigaanera aammalu nunap immikkoortuini peqqissaaveqarfiit tallimaasut pilersinneqarnerat Islandimit Savalimmiunillu paasisaqarfigissallugit soqutigineqarput.

Telemedicin soqutigineqartoq

- Aamma telemedicin atorlugit nakorsiartitsinermik nunatsinni misilittakkat aammalu nakorsaatinut aningaasartuutit appasinnerat Savalimmiuni Islandimilu peqqissutsimut naalakkersuisunit paasisaqarfigissallugit soqutigineqarput, tusagassiuutinut nalunaarummi oqaatigineqarpoq.

Tarnikkut peqqissuunissaq anguniarlugu siusissukkut iliuuseqarnissap qitiutillugu aallunneqarnissaa pingaaruteqartoq ataatsimeeqatiginnermi oqaatigineqarpoq. Atornerluisunik katsorsaanermik suliniut aammalu imigassaq pillugu inatsisit oqaluuserisat pingaarnersaraat.

Imigassamut inatsit isumassarsiorfigineqartoq

- Imigassaq pillugu inatsisissatut siunnersuummik Inatsisartut ukiakkut ataatsimiinneranni oqaluuserineqartussamik suliaqarnermi Savalimmiuni Islandimilu inatsisit sukannersut Kalaallit Nunaata isumassarsiorfigai, Namminersorlutik Oqartussat paasissutissiipput.

Suleqatigiinnissamik isumaqatigiissut 2014-imeersoq suleqatigiinnerup ingerlateqqinneqarnissaanut tunngavissaalluartoq aammalu isumaqatigiissutip annertusarneqarnissanut ingerlaavartumik oqaloqatigiittarnissaq naalakkersuisut pingasuusut isumaqatigaat.

Powered by Labrador CMS