Nunani allani nuannarineqarluartoq: Juliap eqqumiitsuliai piumaneqarluartut
Eqqumiitsuliortoq nunasiaataanermit kingornussanik sammisaqartartutut aamma Kalaallit Nunaata Danmarkillu akornanni pissaanerup agguataarneranik sammisaqartartutut ilisimaneqartoq, suliai Nunatsinni kulturikkut ingerlatsivinnit soqutigineqanngillat.
Eqqumiitsuliaasa nunanit allanit soqutigineqarnerat erseqqissumik takuneqarsinnaavoq:
Piffissami matumani Finlandimi Laplandimi illoqarfimmi Rovaniemimi saqqummersitsinermi angisuumi taaguutilimmi ”Wiping The Ice-cream Off Your Face” (Siku kiinnannit tillingiartoruk, kal.) eqqumiitsuliaminik sisamanik saqqummersitseqataaffigaa.
Saqqummersitsinermi pingaarnertut qitiutinneqarluni nunat tamalaat Issittumut eqqumiitsuliornikkut isiginninnerat. Eqqumiitsuliat 35-t eqqumiitsuliortut nunanit tamalaanneersut eqqumiitsuliaat saqqummersinneqarput, taakku ilaat qulingiluat nunani avannarlerneersuullutik, Nunarput ilanngullugu kiisalu Rusland. Eqqumiitsuliortut sinnerisa ilaasortaaffigaat Laplands Kunstnersammenslutning, taakkulu saqqummersitsinerminni ukiuni 30-ni eqqumiitsuliarineqartartut saqqummiuppaat.
Nunatsinni soqutiginninngitsut
Julie Edel Hardenbergip eqqumiitsuliai pingasut Hollandimi World Museumimit pisiaapput, aamma katersugaasivik pigiuagassamisut katersaminut Juliap eqqumiitsuliaannik amerlanerusunik piserusuttoq, taassuma AG-mut oqaatigaa. Taamaattumik piffissami matumani eqqumiitsuliat kalaallit eqqumiitsulianik katersuiffiinut qulakkeerneqartariaqarnersut isumaliutersuutigaa, taakkumi eqqumiitsuliortunit oqaatigineqartut naapertorlugit, soqutiginninnerminnik ersersitsisimanngimmata.
- Tamatuma saniatigut periarfissaavoq, eqqumiitsuliat nunanit allamiunit eqqumiitsulianik katersisartunit pissarsiarineqartarnissaat, tamakkumi ukiuni kingullerni pimoorussillutik neqerooruteqartarmata, Julie Edel Hardenberg tikkuaavoq.
Saammaasseqatigiinnissamut isumalioqatigiissitap sulinerata nalaani, eqqumiitsulianik arfineq-marlunnik suliaqartinneqarpoq, Kalaallit Nunaannut assersuunneqartutut takuneqarsinnaasunik. Tamatumani siunertarineqarluni ”eqqumiitsulianik eqqarsalersitsisinnaasunik” pilersitsisoqarnissaa, soorlumi isumalioqatigiissitap inaarutaasumik nalunaarusiaani taama allassimasoq.
Allaaserisaq tamaat uani AG-mi atuaruk: