aatsitassat
NunaMineralsip akuersissuteqarfiinik ammaasseqqinneq
Ullumikkumiit piffiit akuersissuteqarfiusut NunaMinerals A/S-ip akuersissutaataanut ilassut, matumani ujarlersinnaanermut akuersissut 2006/10 kisiat pinnagu qinnuteqarfigineqarsinnaasutut ammaanneqarput
Ullumimiit Aatsitassanut Ikummatissanullu Aqutsisoqarfiup akuersissuteqarfiit NunaMinerals AS-ip misissueqqissaarnermik akuersissutaanut ilaasimasut tamanut ammaateqqippai
Namminersorlutik Oqartussat tusagassiuutinut nalunaarummi allapput.
Ulloq 16. septemberimit ulloq 15. november 2017-ip tungaanut qinnuteqaatit tiguneqartut qinnuteqartitsinermi ataatsimoorussatut suliarineqassapput. Qinnuteqaatit tiguneqartut qinnuteqartitsinermi periusaasut nalinginnaasut naapertorlugit suliarineqassapput.
Piffiit ammaassivigineqaqqittut atugassarititaasut nalinginnaasut naapertorlugit qinnutigineqarsinnaapput. Piffiit qinnuteqaatinut assigiinngitsunut tamanut ammaanneqarput, tassunga ilanngullugit annikitsumik aatsitassarsiornermi ingerlatatut kiisalu nalinginnaasumik aatsitassarsiornermik ingerlatatut, Namminersorlutik Oqartussat paasissutissiipput.
Ukioq kingulleq NunaMinerals A/S Kalaallit Nunaata Eqqartuussiviani akiliisinnaajunnaartutut nalunaarutigineqarpoq. Periutsit nalinginnaasut naapertorlugit Aatsitassanut Ikummatissanullu Aqutsisoqarfiup akuersissutit pigineqartut siunissaat pillugu akiliisinnaajunnaarnermik nakkutilliisoq qanimut oqaloqatigisarpaa. Periutsit nalinginnaasut naapertorlugit akuersissutinik piginnittup akuersissutimi nutaanut akuersissuteqalersussanut tunniunnissamut periarfissaqarpoq.
NunaMinerals A/S akiliisinnaajunnaaqqasup akuersissutip ataatsip nutaanut akuersissummik piginnilersussamut tunniunnissaa qinnuteqaatigaa. Ujarlernissamut akuersissut 2006/10-mik normoqarpoq, kujataanilu Nanortallip avannaani/avannaata kitaani piffimmi Vagarimi inissisimalluni.
- Naalakkersuisut akuersissummik tunniussinermik akuersinerminni piffiup akuersissuteqarfiusoq pillugu akuersissummik sivitsuinermi Uunartup Kangerluani piffiit marluk akuersissuteqarfimmit peerneqarnissaat piumasaqaatigaat. Piffiit marluk taakku Naalakkersuisut annikitsumik aatsitassarsiornermik ingerlatsisunut immikkoortippaat. Akuersissutit arfineq pingasut sinneri utertinneqarput maannalu ammaqqinneqarlutik, Namminersorlutik Oqartussat nalunaaruteqarput.